CEDEAO yafatiye ibihano Mali

Inyeshyamba z'abatuwarege Uwufise ububasha kw’isanamu AFP
Image caption Inyeshyamba z'abatuwarege

Abakuru b'ibihugu bigize umuryango w'ibihugu byo muri Afurika y'Uburengerazuba, CEDEAO, bari mu nama i Dakar muri Senegal bafatiye abasirikare bahiritse ubutegetsi muri Mali hashize iminsi 10 ibihano byo mu rwego rw'ubukungu, ububanyi n'amahanga n'izindi nzego.

Imipaka ya Mali yafunzwe kandi guhera uyu munsi leta ya Mali ntishobora gukoresha banki nkuru y'uwo muryango.

Abakuru b'ibihugu bo mu muryango wa CEDEAO bavuze ko ibyo bihano bizagumaho kugeza igihe muri Mali hasubiriyeho inzego zishingiye ku itegeko nshinga.

Uyu muryango kandi wavuze ko ugiye kwegeranya ingabo zishobora kwifashishwa mu kubona umuti w'ikibazo cyo muri Mali.

Aho muri Mali kandi inyeshyamba z'abo mu bwoko bw'Abatuareg mu minsi mike cyane zimaze kwigarira igice kinini cy'amajyaruguru y'igihugu.

Izi nyeshyamba, zishaka ko akarere gatuwemo n'abatuwarege kigenga, ejo zafashe umujyi wa Timbuktu wari usigayemo ingabo za leta mu majyaruguru ya Mali.