ICC irashakisha Mudacumura na Ntaganda

Umushinjacyaha mukuru w'urukiko mpuzamahanga mpanabyaha bwana Ocampo yavuze ko ashaka ko Sylvestre Mudacumura afatwa. Ngo n'umuyobozi w'umutwe w'iterabwoba umaze imyaka ukorera mu burasirazuba bwa Congo. Umutwe wa FDLR.

Umushinjacyaha w'urukiko mpuzamahanga mpanabyaha arega Mudacumura ibyaha 9 byakozwe mu ntambara n'ibyaha 5 byakorewe inyokomuntu, birimo ubwicanyi no gusambanya abaturage ku ngufu.

Ocampo kandi aranasaba ko ibyo byaha byakongerwa ku bisanzwe biregwa General Bosco Ntaganda. Ntaganda we asanzwe aregwa n'uru rukiko ibyaha byo gushyira abana mu gisirikare. Urukiko mpuzamahanga mpanabyaha rero gukomba kubanza kwemera niba ibyo birego bifite agaciro.

Bwana Ocampo yavuze ko abo bagabo aribo ba ruharwa mu bayobozi b'imitwe yitwaje ibirwanisho ikorera muri Congo, ati ifatwa ryabo rizaba ikimenyetso gikomeye kizanya amahinduka ku bwicanyi bubera muri ako karere.

Bwana Ocampo yavuze ko hari amahirwe menshi yiyongereye mu gufata General Ntaganda.

Leta ya Kinshasa yari yanze kumufata kubera amasezerano y'amahoro yari yagiranye n'umutwe we wa CNDP mu mwaka w'i 2009, ariko kuva aho atorokeye abategetsi ba Kinshasa batangaje ko bashaka kumuta muri yombi.

Bwana Ocampo ariko yavuze ko bikigoye cyane gufata Sylvestre Mudacumura.