Cote d'Ivoire: HRW irashinja imitwe yitwaje intwaro

Human Rights Watch
Image caption Human Rights Watch

Ishyirahamwe riharanira uburenganzira bw'ikiremwamuntu Human Rights Watch riravuga ko imitwe yitwaje ibirwanisho irwanya leta ya Cote d'ivoire yinjije abana mu gisirikare no inagaba ibitero byambuka imipaka mu mezi ashize.

Human Rights Watch ivuga ko abantu bakomeje gutsimbarara ku wahoze ari Perezida wa Cote d'Ivoire Laurent Gbagbo begeranije abana b'imyaka 14 mu gihugu cya Liberia kugira ngo bagabe ibitero mu duce tumwe twa Cote d'Ivoire.

Hashize ukwezi gusaga igitero cyambutse umupaka gihitanye abantu 8.

Icyegeranyo cya Human Rights Watch kivuga ko aba barwanyi babona inkunga y'amafranga ivuye mu bashyigikiye Gbagbo bahungiye muri Ghana.

Iki cyegeranyo kivuga ko bamwe mu bari inyuma y'ibi bitero banagize uruhare mu byaha by'intambara mu gihe cy'imvururu zabaye muri Cote d'Ivoire umwaka ushize ariko ngo ubutegetsi bwa Liberia bukaba bwarananiwe kubata muri yombi.