Ibisasu by'abiyahuzi i Kandahar

Abarwanyi b'abatalebani
Image caption Abarwanyi b'abatalebani

Igipolisi cyo muri Afghanistani kiravuga ko ibyihebe bibiri byiturikirijeho ibisasu byahitanye abantu byibura 22 mu isoko riri hafi y'ikibuga cy'indege cy'i Kandahar.

Umukuru w'igipolisi mu ntara ya Kandahar, Abdul Raziq yatangaje ko aho hantu hakoreshwa n'abashoferi bagemurira ingabo z'umuryango wo gutabarana wa OTAN.

Abantu bagera kuri 50 biravugwa ko bakomerekeye muri icyo gitero hafi y'ikibuga cy'indege kiri muri uwo mujyi ahar ikigo kinini cy'ingabo za OTAN.

Abatalibani biyemereye ko aribo bagabye icyo gitero. Ubusanzwe intara ya Kandahar ni indiri y'abatalibani.

Abategetsi baravuga ko hafi y'abantu bose baguye muri icyo gitero bari abasivili barimo abacuruzi n'abantu bigenderaga.

Bamwe mu bakomeretse biravugwa ko bamerewe nabi cyane.