Korea y'uburaruko yasubiye kwihanga amakungu

Ibiherutse kuvugururwa: 12 ukwa kabiri, 2013 - 12:34 GMT
Igerageza ry'inguvu nulceaire rya Korea y'uburaruko

Igerageza ry'inguvu nulceaire rya Korea y'uburaruko

Korea y'uburaruko yasubiye kugerageza inguvu zayo za nucleaire, isuzugura ingingo y'umuryango mpuzamakungu ONU wayigabishije.

Vyatumye Ubushinwa, igihugu conyene gisigaye kinywanye na Korea y'uburaruko, bwiyamiriza iryo gerageza co kimwe n'ibindi bihugu hirya no hino kw'isi.

Ikigo mpuzamakungu kijejwe kurereka ikoreshwa ry'inguvu za nucleaire kiri i Vienna, cavuze ko iryo gerageza, rya mbere rigizwe kuva Kim Jong-un yaja ku butegetsi, rirusha ubukomezi inshuro zibiri iryagizwe na Korea y'uburaruko nyene mu 2009.

Ibiro bitara amakuru vy'ico gihugu vyavuze ko iryo gerageza ryakoresheje igikoresho gitoyi, catanze inguvu nyinshi cane z'uguturika.

Ababikurikiranira hafi bavuga ko ico gikoresho caturikirijwe mu kuzimu, gishobora gutuma Korea y'uburaruko itera intambwe nini mu nzira yo gukora igisasu ruhonyanganda gitoyi gishobora gushirwa mu kigendajuru ca misile kiraswa kure cane.

Amakungu yavyiyamirije

Ubushinwa bwagaragaje ko budashigikiye na gato igerageza rya Korea y'uburaruko, bukaba bwabariye ico gihugu ko bishobora guhungabanya akarere, ariko kandi busaba abategetsi b'amakungu kuvyitwaramwo buhoro.

Umukuru w'igihugu wa Amerika Barack Obama yavuze ko iryo gerageza ari agasomborotso karengeje, nayo ishirahamwe ry'abivunira umwanshi hamwe OTAN, rivuga ko ari ukutabinegwa.

Ubuyapani buvuga ko bwihandangirije bwivuye inyuma Korea y'uburaruko, nayo iy'ubumanuko ikaba yaciye imera magabo.

Ariko Irani yavuze ko ibihugu bisanzwe bifise ibirwanisho ruhonyanganda, bigomba kubanza kubisambura imbere yo kubwira abandi ngo bareke kuvyubaka.

Vyitezwe ko umugwi w'umutekano wa ONU uhura uno munsi kugira uganire kuri ico kibazo.

BBC © 2014 BBC ntabwo yishingiye ibibera hanze y'imbuga zayo.

Uru rupapuro ruboneka neza ukoresheje amashakiro mashyashya ya CSS. Mugihe amashakiro yawe adakorana na CSS ntushobora kubona ibiri kuri uru rupapuro byose cyangwa neza. Niba bishoboka shakisha amashakiro mashyashya ya software cyangwa CSS niba washobora kubikora.