Nelson Mandela ntabwo akiri mu bitaro

Ibiherutse kuvugururwa: 6 ukwa kane, 2013 - 13:56 GMT
Nelson Mandela

Nelson Mandela ubu afite imyaka y'amavuko 94

Nelson Mandela, wari umaze iminsi arwaye indwara y'umusonga, yaraye iwe mu rugo nyuma yo gusezererwa mu bitaro biri mu mujyi wa Johanesbourg.

Itangazo rya leta ya Afurika yepfo rivuga ko Mandela yasezerewe mu bitaro kubera ko akomeje kugenda yoroherwa ku buryo bugaragara.

Iryo tangazo rikomeza rivuga ko abaganga bagiye gukomeza kumwitaho ari iwe mu rugo.

Mandela, ubu ufite imyaka 94 y'amavuko, yagiye mu bitaro ku itariki ya 27 z'ukwezi gushize kwa gatatu, ababara na none mu bihaha.

Icyo gihe abaganga bakaba baravomye mu bihaha bye ibintu bimeze nk'amazi byarimo.

Mu kwezi kwa 12 ku mwaka ushize, Mandela yamaze iminsi 18 mu bitaro nanone mu byo yari arwaye hakaba harimo indwara yo mu bihaha.

Mu kwezi kwa kabiri k'uyu mwaka nabwo abaganga bagombye kumwitaho kubera ko yari arwaye mu gifu.

Nelson Mandela yabaye Perezida wa mbere w'umwirabura wa Afurika yepfo guhera muri 1994 kugeza muri 1999 nyuma yaho haviriyeho ubutegetsi bw'abazungu yarwanyije bwavanguraga amako.

Abanyafurika benshi bamufata nk'umubyeyi w'igihugu.

BBC © 2014 BBC ntabwo yishingiye ibibera hanze y'imbuga zayo.

Uru rupapuro ruboneka neza ukoresheje amashakiro mashyashya ya CSS. Mugihe amashakiro yawe adakorana na CSS ntushobora kubona ibiri kuri uru rupapuro byose cyangwa neza. Niba bishoboka shakisha amashakiro mashyashya ya software cyangwa CSS niba washobora kubikora.