Mandela yarushijeho kuremba

Nelson Mandela n'umugore we Graca Machel
Image caption Nelson Mandela n'umugore we Graca Machel

Leta ya Afurika yepfo yatangaje ko Nelson Mandela yarushijeho kuremba mu bitaro arimo kwivurizamo indwara y'ibihaha.

Perezida wa Afurika yepfo, Jacob Zuma, yatangaje ko yasuye Mandela mu bitaro kandi akavugana n'umugore we ndetse n'abaganga bamuvura.

Mu itangazo yashyize ahagaragara, Perezida Zuma yavuze ko abaganga bari bamubwiye ku cyumweru ko Mandela yari amaze amasaha 24 ameze nabi cyane.

Yongeyeho ko abaganga barimo gukora ibishoboka byose kugirango yoroherwe.

Nelson Mandela - wabaye perezida wa mbere w'umwirabura wa Afurika yepfo - yajyanywe mu bitaro byo mu mujyi wa Pretoria mu ntangiriro za kuno kwezi ku nshuro ya gatatu muri uno mwaka arwaye indwara y'ibihaha.

Perezida Jacob Zuma - wari urikumwe na visi perezida we akaba n'uwungirije umukuru w'ishyaka rya ANC, Cyril Ramaphosa - yasabye abantu gusengera Mandela n'abaganga bamuvura.