Misiri: abiciwe i Cairo bararenga 500

Mu gihugu hakurikizwa amategeko adasanzwe y'umukwabo
Image caption Mu gihugu hakurikizwa amategeko adasanzwe y'umukwabo

Abategetsi ba Misiri baravuga ko abantu 525 bapfuye ku wa gatatu igihe inzego zishinzwe umutekano zagabaga igitero ahantu abashyigikiye Mohammed Morsi bakoreraga imyigaragambyo.

Umubare w'abahasize ubuzima ushobora kwiyongera.

Benshi mu bapfuye baguye mu murwa mukuru Cairo ariko rero ibikorwa by'urugomo bwanagaragaye hirya no hino mu gihugu kuri uwo munsi amaraso yamenetse ari menshi kurusha iyindi kuva aho yabereye imyigaragaramyo isaba demokarasi hashize imyaka ibiri.

Umubare w'abapfuye biravugwa ko ushobora kuba ari munini kurushaho kubera ko hari imirambo myinshi itarabarurwa.

Abashyigikiye Mohammed Morsi wavanywe ku butegetsi n'igisirikare mu kwezi gushize baravuga ko abantu barenga 2000 ari bo bapfuye.

Ishyaka rya Muslim Brotherhood rishyigikiye Morsi rirategura imyigaragambyo yo kwamagana iyicwa ry'abo bantu.

Leta zunze ubumwe z'Amerika n'ibindi bihugu byamaganye icyo gikorwa cy'inzego zishinzwe umutekano mu Misiri.

Ubu mu gihugu guhera ejo hatangiye gukurikizwa amategeko adasanzwe y'umukwabo.