Syria: OPCW yasenye intwaro z'uburozi

OPCW
Image caption Impuguke zisuzuma intwaro z'uburozi muri Syria

Ishyirahamwe mpuzamahanga rishinzwe kuvanaho intwaro z'uburozi, OPCW, ryatangaje ko ahantu izo ntwaro zikorerwa muri Syria hasenywe.

Iryo tangazo rya OPCW ryasohowe hasigaye umunsi umwe ngo umunsi ntarengwa Amerika n'Uburusiya bari bumvikanyeho ko ibyo birwanisho bizaba byasenywe ugera.

Mu kwezi gushize havuzwe ko imbuga 21 muri 23 zivugwaho ko zakoreragwamo izo ntwaro z'uburozi zasuzumwe.

Ibikoresho bisigaye muri zo mbuga ebyiri nabyo byarasuzumwe, mbere yuko byimurirwa ahandi.

Havugwa ko ibikora izo ntwaro z'uburozi n'ibirwanisho birenga amatoni 1000 bitarasennywa.