CAR: Ubufaransa bushyigikiye ingabo mpuzamahanga

Image caption Umusirikare w'umufaransa i Bangui

Ministiri w'ingabo mu Bufaransa, Yves Le Drian, aravuga ko bagiye kohereza muri République centreafricaine abandi basirikare babarirwa mu majana kugirango bafashe icyo gihugu kidasenyuka burundu.

Umuryango w'abibumbye, ONU, uravuga ko icyo gihugu kiri kugana muri rwaserera, na leta y'inzibacyuho ikaba idashoboye guhagarika imitwe y'abaryanyi n'inyeshyamba.

Abakurikiranira hafi ibiba muri cyo gihugu barikuvuga ko hashobora kuba jenoside.

Ubufaransa burashaka ko inama ya ONU ishinzwe umutekano ku isi ishyigikira kwongera umubare w'ingabo mpuzamahanga ziri muri cyo gihugu.

Uwungirije umunyamabanga mukuru wa ONU, Jan Eliasson, yavuze ko abasivili muri République centreafricaine bari guca mu bintu birenze kwemera.

Ingabo z'abafaransa zigeze kuri 400 ziri muri cyo gihugu aho zishinzwe gucunga umutekano ku kibuga k'indege mu murwa mukuru wa Bangui.