Thaïlande: Imyigaragambyo irakomeje

Image caption Abigaragambya i Bangkok barwanya leta

Abigaragambya barwanya leta muri Thaïlande babarirwa mu magana batangiye imyigarambambyo ku icyicaro k'igisirakare.

Binjiye ku ngufu mu mbuga y'icyo cyicaro mu murwa mukuru, Bangkok.

Bahavuye nta rwaserera nyuma yo gusaba igisirikare kubafasha mu gikorwa cyabo cyo kwamagana ubutegetsi bwa Yingluck Shinawatra.

Abo bantu bamaze icyumweru bigaragambya, barashinja ministiri w'intebe ko akoreshwa na musaza we wahoze ari ministiri w'intebe muri cyo gihugu, Thaksin Shinawatra, ubu uba mu buhungiro.

Ejo abadepite mu nteko nshingamategeko bavuze ko bagifitiye Yingluck Shinawatra ikizere.

Ku ruhande rwe, ministiri w'intebe Shinawatra yavuze ko nta migambi yo gukoresha amatora mashya igihe yateganirijweho kitaragera, ariko yatangaje ko yiteguye kugirana ibiganiro nabo.