Abanyamisiri barakajwe nuko Mubarak atagikurikiranwe

Mubarak yashinjwaga kwica abari mu myigaragambyo imurwanya. Uwufise ububasha kw’isanamu AP
Image caption Mubarak yashinjwaga kwica abari mu myigaragambyo imurwanya muri 2011.

Igipolisi cya Misiri cyatatanyije abantu bari mu myigaragambyo yamagana icyemezo cy’urukiko cyo kudakurikirana Hosni Mubarak washinjwaga icyaha cyo kwica abantu bari mu myigaragambyo yavanyeho ubutegetsi bwe muri 2011.

Abantu ibihumbi bibiri nibo bari bateraniye ku rubuga rwa Tahrir ahatangiriye imyigaragambyo yamuvanye ku butegetsi.

Umuntu byibura umwe biravugwa ko yaguye mu bikorwa byo gukozanyaho n’igipolisi.

Ku wa gatandatu, urukiko rwo mu Misiri rwaretse gukurikirana Hosni Mubarak mu rubanza yashinjwagamo kugambirira kwica abantu 239 bari mu myigaragambyo yavanyeho ubutegetsi bwe.

Abandi bantu 7 bari abayobozi ku butegetsi bwe barimo n’uwari minisitiri w’ubutegetsi bw’igihugu nabo bavaniweho ibyaha bari bakurikiranweho.

Bose bari barahamijwe icyaha cyo kugambirira kwica maze bakatirwa gufungwa burundu mu kwezi kwa 6 muri 2012.

Ariko urubanza rwabo rwasubiwemo mu mwaka ushize kubera ko byavugwaga ko hari aho amategeko atubahirijwe.

Muri rusange abantu bagera kuri 800 bivugwako aribo bishwe n’inzego zishinzwe umutekano zari zihanganye n’abigaragambyaga hasigaye ibyumweru bike ngo Mubarak yeguye ku butegetsi mu kwezi kwa kabiri kwa 2011.

Hosni Mubarak, ubu ufite imyaka 86, afungiwe ikindi gihano cy’imyaka 3 yahawe kubera kunyereza umutungo wa leta.