DRC: Agahenge i Kinshasa n'i Goma

Abafashwe n'igipolisi cya Congo
Image caption Abafashwe n'igipolisi cya Congo

Inteko nkenguzamateka yo muri Repubulika Iharanira Demokarasi ya Congo yemeje ko bahindura umushinga w'itegeko rigenga amatora ryateje imvururu mu minsi ishize.

Bakuyemo ingingo yarigutuma amatora y'umukuru w'igihugu yarateganijwe umwakataha, ashobora kuzakererwa bigatuma Prezida Joseph Kabila atinda k'ubutegetsi nkuko abarwanya ubutegetsi babivugaga.

Biteganije ko mu cyumweru gitaha inteko zombi zizatora bwa nyuma iryo tegeko.

Internet yasubiyeho nyuma yaho leta ifatiye icyemezo cyo kuyifunga kugirango ipfubye ibikorwa by'abigaragambya, ariko imbuga nkoranyambaga n'amatelephone ngendanwa yo aracyafite ibibazo.

Ibyo byatumye hagaruka agahenge i Kinshasa ku murwa mukuru wa Congo, no mu mijyi ya Goma na Bukavu ahari hadutse imyigaragambyo.

No kuri Kaminuza y'i Kinshasa hagarutse umutekano nyuma yaho igipolisi kinjiriyeyo kikarwana n'abigaragambyaga, kikanafata bamwe muribo.