Imbaga y'abantu yakiriye Bob Rugurika

Bob Rugurika yari ashinjwa ubufatanyacyaha mu iyicwa ry'ababikira b'abataliyani.
Image caption Bob Rugurika ashinjwa ubufatanyacyaha mu iyicwa ry'ababikira 3 b'abataliyani.

Abantu babarirwa mu bihumbi bari mu mihanda y'i Bujumbura kwakira umuyobozi mukuru wa Radio RPA, Bob Rugurika, wasohotse muri gereza uyu munsi nyuma yaho urukiko rumwemereye kuburana ari hanze.

Abamwunganira baravuga ko urukiko rw'ubujurire rwa Bujumbura rwafashe icyo cyemezo rwanamutegetse kwishyura amafaranga y'ingwate angana na miliyoni 15 z'amafaranga y'amarundi.

Bob Rugurika ashinjwa ubufatanyacyaha mu iyicwa ry'ababikira batatu b'abataliyani.

Hari hashize igihe abashyigikiye Bob Rugurika basaba ko arekurwa akaburana ari hanze.

Uyu mukuru wa Radio RPA yatawe muri yombi ku itariki ya 21 z'ukwezi gushize maze ajya gufungirwa mu ntara ya Muramvya.

Icyo gihe Radio RPA yari imaze iminsi ivugishije umuntu wiyemerera ko ariwe wishe abo babikira batatu b'abataliani biciwe mu Kamenge mu kwezi kwa cyenda.

Yanavugaga kandi ko hari abakozi bo mu iperereza ry'Uburundi babugizemo uruhare.