Mc Kinstry niwe ugiye gutoza ikipe y'Urwanda

Johnny Mc Kinstry yatojeje Sierra Leone afite imyaka 27 gusa
Image caption Johnny Mc Kinstry yatojeje Sierra Leone afite imyaka 27 gusa.

Johnny MC Kinstry ukomoka muri Ireland ya ruguru ni we watoranijwe kuba umutoza mukuru w'ikipe y'igihugu y'Urwanda y'umupira w'amaguru.

Uyu mugabo w'imyaka 29 gusa yari asigaranye na bandi bane bahanganye kuri uyu mwanya.

Mc Kinstry yashoboye kugeza bwa mbere igihugu cya Sierra Leone ku mwanya wa 50 w'urutonde rwa FIFA kandi akaba icyo gihe yari umutoza muto mu mupira mpuzamahanga.

Izi nshingano asimbuyeho umwongereza Stephen Constantine azazifatanya no gutoza ikipe y'igihugu y'abatarengeje imyaka 23 ndetse n'iy'abari munsi yimyaka 20.

Ni we uzayobora ikipe y'Urwanda mu majonjora y'igikonmbe cya Afurika cya 2017, icy'isi cya 2018 ndetse n'imikino Olympique ya 2016.

Mu bo bari bahatanye harimo uwahoze ari umutoza wungirije muri Chelsea Jose Morais, umunya Turikiya Engin Firat ndetse n'Umudage Hans Michael Weiss.

Uwari umutoza w'U Rwanda Stephen Constantine yeguye mu kwezi kwa mbere yerekeza mu Buhindi gutoza ikipe y'igihugu yabwo.

Mc Kinstry yahawe gutoza Sierra leone afite imyaka 27 gusa, mu mikino itandatu ye ya mbere atsindwa umwe gusa.

Yaje kwirukanwa ariko nyuma yo gutsindwa na Cote d'Ivoire ndetse na Congo-Kinshasa mu majonjora yimikino y'igikombe cya Africa cy'uyu mwaka nyuma y'amezi 6 gusa yari ashize ahawe aka kazi ku buryo buhoraho.