Imyigaragambyo yasubukuwe mu Burundi

Abigaragambya bakomeje gusaba Perezida Nkurunziza kutongera kwiyamamaza. Uwufise ububasha kw’isanamu Getty
Image caption Abigaragambya bakomeje gusaba Perezida Nkurunziza kutongera kwiyamamaza.

Abasirikare barashe mu kirere mu gihe hasubukurwaga imyigaragambyo yamagana icyemezo cya Perezida Pierre Nkurunziza cyo kwiyamamariza kwongera kuyobora igihugu ku nshuro ya gatatu.

Ibi bibaye nyuma yaho haburijwemo mu cyumweru gishize igikorwa cyo guhirika ubutegetsi.

Umunyamakuru wa BBC, Ruth Nesoba, uri i Bujumbura aravuga ko insoresore zibarirwa muri mirongo zari zafunze imihanda mu duce tumwe tw'umurwa mukuru.

Baririmbaga basaba Perezida Nkurunziza kureka kwongera kwiyamamaza mu matora y'umukuru w'igihugu ateganijwe mu kwezi gutaha.

Ku cyumweru, Perezida wa Kenya - Uhuru Kenyatta - yasabye Perezida Nkurunziza kwigiza inyuma amatora.

Amaduka amwe ntiyafunguye nta na kazi kakozwe muri Nyakabiga, Musaga na Mutakura.

Ahandi ubuzima bwakomeje nkuko bisanzwe.

Ambasade ya Leta zunze ubumwe za Amerika yasabye abakozi bayo batari kamara cyane n'imiryango yabo kuva mu Burundi kubera 'umutekano ugenda uba mubi'.

Hagati aho, Perezida Pierre Nkurunziza yasezereye ku kazi abaminisitiri batatu mu bagize leta ye.

Emmanuel Ntahonvukiye, w'umusivile, niwe wasimbuye Pontien Gaciyubwenge muri minisiteri y'ingabo naho Alain Aime Nyamitwe asimbura Laurent Kavakure muri minisiteri y'ububanyi n'amahanga.

Ministri w'ubucuruzi nawe yasezerewe.