Igitero cy'umwiyahuzi muri Arabia Saudite

Biravugwa ko abantu benshi baguye muri icyo gitero. Uwufise ububasha kw’isanamu AFP
Image caption Biravugwa ko abantu benshi baguye muri icyo gitero.

Umwiyahuzi yiturikirijeho igisasu ku musigiti w'abayisilamu b'abashia muri Arabia Saudite.

Abantu benshi biravugwa ko bishwe cyangwa bagakomekera muri iki gitero cyabereye mu ntara y'uburasirazuba yiganjemo abashia.

Agace kamaze igihe karangwamo imyigaragambyo ya hato na hato n'imvururu z'abashia basaba uburenganzira bwisumbuye ku bwo bafite.

Bibaye mu gihe Arabia Saudite ikomeje gushaka ubufatanye bw'amaleta y'abasuni.

Amashusho yerekana ibice by'umubiri byashwanyaguritse n'amaraso yuzuye hasi ni ibintu bidakunze kuboneka muri Arabia Saudite.

Umwiyahuzi yahisemo kwiturikirizaho igisasu mu gihe cy'amasaha y'amasengesho kuwa gatanu igihe abantu bagera kuri 200 bari mu musigiti wa Imam Ali.

Mu mezi ashize hari igitero cyahitanye abantu cyagabwe ku musigiti w'abashia mu ntara y'Uburasirazuba.

Ariko rero kubera igitero cy'uyu munsi cyahitanye benshi kandi kikagabwaga n'umwiyahuzi bishobora gutuma birushaho kugira uburemere.

Umwuka ntiwari usanzwe umeze neza cyane muri iyo ntara aho umwe mu bayobozi bubashywe cyane b'abashia, Sheikh Nimr aherutse gukatirwa igihano cyo gupfa.

Abashia bavuga ko amagambo y'ubuhezanguni abamagana yiyongereye mu gihe indege z'intambara za Arabia Saudite zakazaga ibitero byazo ku nyeshyamba z'abahouti zo muri Yemeni -- aba nabo akaba ari abashia.