6 bapfuye igihe igipolisi cyateraga mu Cibitoke

Igipolisi ngo cyashakishaga abakora imyigaragambyo mu Cibitoke.
Image caption Igipolisi ngo cyashakishaga intwaro zitunzwe mu buryo butemewe n'amategeko.

Abantu bagera kuri batandatu baguye mu gitero cyagabwe na polisi y'u Burundi mu murwa mukuru Bujumbura.

Inzego zishinzwe umutekano ziravuga ko hapfuye umupolisi n'abaturage b'abasivile batanu.

Icyegera cy'umuvugizi wa polisi, Pierre Nkurikiye, yabwiye abanyamukuru ko abapolisi binjiye muri Cibitoke bashakisha intwaro zitunzwe mu buryo butemewe n'amategeko.

Umunyamakuru Abbas Mbazumutima yakurikiranye ikiganiro cya polisi, yavuze ko hari intwaro polisi yatangaje ko yafashe.

Ababonye ibyabaye bavuze ko abanyagihugu bakoresheje imbunda n'ibisasu bya grenade batera abapolisi.

Urwo ruhagagrara rubaye hashize iminsi ibiri mu Burundi habaye amatora y'abagize inama nshinga mategeko n'abajyanama b'amakomini.

Ayo matora ntiyitabiriwe n'abatavuga rumwe na leta bamagana icyemezo cya Perezida Pierre Nkurunziza cyo kwiyamamaza kongera kuyobora igihugu ku nshuro ya gatatu.

Amatora y'umukuru w'igihugu ateganijwe mu byumweru bibiri biri imbere.