Kenya yatangiye kurwanya inzoga zitemewe

Umwaka ushize, abantu barenga 70 bahitanywe n'inzoga zitemewe.
Image caption Umwaka ushize, abantu barenga 70 bahitanywe n'inzoga zitemewe.

Abategetsi bo muri Kenya batangiye igikorwa cyo kurwanya mu gihugu hose inzoga zikozwe mu buryo butemewe n'amategeko zikorerwa mu mago y'abantu.

Perezida Uhuru Kenyatta yatangije icyo gikorwa nyuma yaho abagore bazamaganye bavuga ko zibasenyera ingo.

Umunyamakuru wa BBC uri mu karere ko hagati muri Kenya aravuga ko bene izo nzoga zigura make zikundwa cyane ahongaho.

Abantu barenga 70 barapfuye muri ako karere mu mwaka ushize kubera izo nzoga kandi n'abagabo benshi zituma badashobora kubyara.

Leta yambuye impushya zo gucuruza utubari n'amaduka acuruza izo nzoga bivugwa ko zica.

Hakunze gukoreshwa ibintu bifite uburozi nka methanol mu kuzikora.