Abateye ingabo z'u Burundi berekanywe

Image caption Abafashwe bambuwe inkweto. Berekaywe n'igisirikare cy'u Burundi.

Igisirikare cy’u Burundi cyerekanye abarwanyi, kivuga ko bafashwe cyangwa bitanze, nyuma y’igitero cyo ku wa gatanu w’icyumweru gishize, mu ntara ya Kayanza iri mu majyaruguru y’igihugu, hafi y’u Rwanda.

Igisirikare cyagiye kuberekanira mu ntara ya Cibitoke uyu munsi, aho kivuga ko icyo gitero cyaje gituruka. Abanyamakuru beretswe intwaro zafashwe, bababwa n'uburenganzira bwo kuganira n'abo batawe muri yombi. Bamwe mu bafashwe bavuze ko batorejwe mu Rwanda.

Mu kiganiro n’abanyamakuru, umuvugizi w’ingabo z’u Burundi Col Gaspard Baratuza yagize ati: “Ku ruhande rw’igisirikare cyacu, hamaze gukomereka abasirikare batandatu, hariho umusivile witabye Imana. Ku ruhande rw’abateye, mirongo itatu n’umwe baritabye Imana. Abashika ijana na mirongo irindwi barafashwe, bakaba bagizwe imbohe, ubu bari mu gipolisi.”

Imirwano ikomeye yarwaywe hagati y’abateye n’ingabo z’u Burundi, yabereye mu makomini ya Bukinanyana na Kabarore. Ingabo z’igihugu zemeza ko zafashe imbunda zikomeye zirimo mitarayeze na karacinikove ndeste n’ibikoresho bya gisirikare nk’amaradio akoreshwa n’abasirikare mu kuvugana ku rugamba.

Igisirikare gitangaza ko kitaramenya neza aho baje bava kubera ko iperereza ritararangira.

Ariko mu bafashwe, hari abemera ko bateye baturutse ahantu hatandukanye. Berekaywe nta nkweto bambaye kandi bose bari bambaye imyenda ya gisivile.

Bamwe bavuga ko bafashwe bagiye mu masoko hakurya mu Rwanda, ngo babeshywa ko bagiye guhabwa akazi. Abandi ngo bari mu mashyamba atandukanye yo mu Rwanda.