Perezida Nkurunziza ari imbere mu majwi

Uwatsinze amatora ntabwo yari yamenyekana. Uwufise ububasha kw’isanamu AFP
Image caption Uwatsinze amatora ntabwo yari yamenyekana.

Mu Burundi ibyavuye mu matora y'umukuru w'igihugu yaraye abaye byatangiye kumenyekana, umukuru w'igihugu Pierre Nkurunziza yiyamamaje ku izina ry'ishyaka riri ku butegetsi CNDD-FDD, akaba ari imbere mu majwi amaze kubarurwa, agakurikirwa na Agathon Rwasa wo mu runani Amizero y'abarundi.

Intara 10 kuri 18 zigizwe Uburundi nizo zimaze gutangaza by'agateganyo ibyavuye mu matora y'umukuru w'igihugu.

Perezida Nkurunziza ari imbere mu ntara 8 kuri izo 10. Aho asa naho yarushinjwe ni muri Bujumbura rural na Bujumbura mairie aho Agathon Rwasa aza imbere.

Akanama gashinzwe amatora CENI kavuga ibyavuye mu matora mu buryo budahinduka bizatangazwa ku wa gatanu.

Umwe mu bayobozi b'akanama gashinzwe amatora - CENI - yatangaje ko mu giturage umubare w'abitabiriye amatora wari munini naho mu bice bimwe by'umurwa mukuru Bujumbura abayitabiriye akaba bari bakeya.

Umuryango w'abibumbye n'umuryango w'ubumwe bwa Afurika byari byarasabye ko ayo matora asubikwa bivuga ko uko ibintu bimeze ubu hatashobora kubaho amatora aboneye kandi arimo ubwisanzure.

Kuva aho Perezida Pierre Nkurunziza atangarije ko aziyamamariza kuyobora igihugu ku nshuro ya gatatu, mu Burundi habaye imyigaragambyo - yaguyemo abantu - yamagana icyo cyemezo bamwe bavuga ko kinyuranye n'itegeko nshinga.

Hanabaye n'igikorwa cyaburijwemo cyo guhirika ubutegetsi mu kwezi kwa gatanu.