Ikirere cya Kenya kizafungwa kubera Obama

Perezida Obama azaba ari mu ruzinduko muri Kenya guhera kuwa gatanu. Uwufise ububasha kw’isanamu AP
Image caption Obama azaba ari mu ruzinduko muri Kenya guhera kuwa gatanu.

Ubuyobozi bw'ibibuga by'indege muri Kenya, KCAA, bwatangaje ko ikirere cy'icyo gihugu kizafungwa ku ndege zose mu gihe cy'iminota 50 ku wa gatanu mbere yuko indege ya Perezida wa Amerika Barack Obama igwa ku kibuga cy'indege mpuzamahanga cya Jomo Kenyatta.

Igipolisi cya Kenya cyari cyatangaje kare ko icyo kibuga kizafungwa mu gihe cy'iminsi itatu.

Ubuyobozi bw'ibibuga by'indege buravuga ko bwandikiye amasosiyete yose y'indege n'ibigo by'ubucuruzi bwerekeranye n'ingendo bubimenyesha iby'icyo cyemezo.

Umukuru w'urwego rushinzwe ibibuga by'indege muri Kenya, yavuze ko ikirere kizaba gifunze hagati ya 19:45 GMT na 20:35 GMT ku wa gatanu.

Ikibuga cy'indege cya Jomo Kenyatta kandi kizaba kizongera kufungwa mu gihe cy'iminota 40 ku cyumweru igihe Perezida Obama azaba ava muri Kenya yerekeza muri Ethiopia.