Jose Mourihno ntiyicuza kunenga abaganga

Uwufise ububasha kw’isanamu BBC World Service
Image caption Jose Mourihno ntiyishimiye icyemezo cy'abaganga cyo kuvura Eden Hazard

Jose Mourihno ahagaze ku magambo ye yo kunenga abaganga Eva Carneiro na Jon Fearn.

Umutoza wa Chelsea, Jose Mourihno, yanze kuva ku izima ku magambo anenga itsinda ry’abaganga b’ikipe.

Dr Eva Carneiro n’umuganga ugorora ingingo z’umubiri, Jon Fearn, banenzwe na Mourihno igihe yajyaga mu kibuga kuvura Eden Hazard, byatumye ikipe ye ikina ifite abakinnyi icyenda, bahura na Swansea.

Uwufise ububasha kw’isanamu BBC World Service
Image caption Eden Hazard (hasi mu mabara y'ubururu) yakorewe ikosa igihe Chelsea yakinaga na Swansea

Carneiro na Fearn ntibazagaragara ku ntebe ku mukino uzahuza Chelsea na Manchester City, ariko Mourihno ntiyahakanye ko bazayigarukaho.

Ku wa kane yahuye n’itsinda ry’abaganga kandi avuga ko bafitanye “umubano mwiza”.

Uwufise ububasha kw’isanamu PA
Image caption Umuganga Eva Carneiro yahagaritswe gusubira ku ntebe y'abaganga ba Chelsea.

Cyakora, bivugwa ko Carneiro ari gushaka ubujyanama mu rwego rw’amategeko kuri iki kibazo.

Carneiro na Fearn bagiye kuvura Hazard igihe yakorerwaga ikosa mu minota ya nyuma y’umukino Chelsea yanganyije na Swansea ibitego 2-2.

Uwufise ububasha kw’isanamu Getty
Image caption Dr Eva Carneiro ni umwe mu baganga bamaze igihe mu ikipe ya Chelsea

Icyo gihe byasobanuye ko uyu mukinnyi w’Umubiligi yagombaga gusohoka mu kibuka kuvurwa.

Byatumye Chelsea isigara ifite abakinnyi icyenda kandi n’umunyezamu Thibaut Courtois, yari yamaze kwirukanwa mu kibuga kubera guhabwa ikarita itukura.

Mourihno yavuze ko itsinda rye ry’abaganga bahutiyeho kujya kumuvura kandi ko batigeze “bumva umukino” .