Burundi: Col Jean Bikomagu "yishwe"

Uwufise ububasha kw’isanamu AFP
Image caption Abo mu muryango wa Col Bikomagu bateraniye iwe nyuma y'igitero cyamuhitanye

Umunyamakuru wa BBC uri i Bujumbura avuga ko Col Jean Bikomagu yishwe ku wa Gatandatu arashwe n’abantu bamutegeye imbere y'urugo rwe, mu gace kitwa Kabondo, mu murwa Mukuru Bujumbura.

Ntibisobanutse neza uwahitanye Col Bikomagu, wari uyoboye ingabo igihe imyivumbagatanyo y’amoko yatangiraga mu Burundi mu mwaka wa 1993. Ariko abatangabuhamya babwiye BBC ko Bikomagu yarashwe n'umuntu wari kuri moto, igihe yavaga mu misa mu ma saa 12:30 ku isaha yo mu Burundi. Igihe yageraga ku marembo y'urugo rwe, umurashi yarekuye amasasu, yahise amwica andi akomeretsa umwana we w'umukobwa ku maguru, wahise ajyanwa kwa muganga.

Inkubiri y’ubwicanyi imaze igihe mu murwa Mukuru Bujumbura, yatangiye ikurikira icyemezo cya perezida Pierre Nkurunziza, cyo kwiyamamaza ku nshuro ya gatatu mu matora y’umukuru w’igihugu yatsinze mu kwezi kwa Karindwi.

Inkubiri y’ubwicanyi

Mu minsi micye ishize, uwahoze ashinzwe ingendo z’umukuru w’igihugu, jenerali Adolph Nshimirimana, yapfuye arashwe igisasu cya rokete. Urupfu rwe rwakurikiwe n’iraswa ry’umuyobozi w’umurwango urengera uburenganzira bwa kiremwa muntu, APRODH, Bwana Pierre Claver Mbonimpa.

Uwufise ububasha kw’isanamu
Image caption Benshi bamaze gupfa abandi bakomerekera mu myivumbagatanyo imaze iminsi mu Burundi

Mbonimpa yarashwe n’umuntu wari kuri moto, ariko ararokoka, ubu ari kuvurirwa mu bitaro mu gihugu cy’Ububiligi. Umukobwa we Amandine Nasagarare yabwiye BBC Gahuzamiryango ko ubuzima bwe buri mu kaga kubera ko hari abantu bamuhozaho inkeke kandi atazi.

Uwufise ububasha kw’isanamu
Image caption Imyigaragambyo yatewe n'icyemezo cya perezida Pierre Nkurunziza cyo kwiyamamaza yaranzwemo urugomo

Bicye kuri Col Jean Bikomagu

Col Jean Bikomagu wari mu za bukuru, yabaye umugaba w’ingabo z’U Burundi ku butegetsi bwa perezida Melchior Ndadage, akomeza no kwa Sylvestre Ntibantunganya ndetse no ku bwa Pierre Buyoya. Amaze kuva mu gisirikare yahawe akazi muri sosiyete ya Leta y’ubwishingizi “SOCABU”. Bwana Bikomagu ntiyari akigaragara mu bikorwa bya politike muri iki gihe.

BBC, yagerageje gushaka amakuru arambuye mu rwego rw’igipolisi cyangwa izindi nzego z’umutekano mu Burundi, ariko ntibyakunda, kugeza igihe iyi nkuru yandikwaga.

Bwana Bikomagu nta bikorwa bya politike yagaragaragamo muri iki gihe.

Icyegeranyo cy’Umuryango w’Abibumbye cyavuze ko Col Bikomagu yari inyuma y’iyicwa ry’uwahoze ari perezida w’u Burundi Melchior Ndadaye, urupfu rwe rwabaye imbarutso y’intambara yamaze imyaka 13.