Calais: Umubare w'abimukira wagabanutse

Uwufise ububasha kw’isanamu Getty
Image caption Ikibazo cy'abimukira i Calais gihangayikishije Uburayi

Umubare w’abimukira bagerageza kunyura mu muyoboro uhuza Ubwongereza n’Ubufaransa hafi ya Calais wageze ku 150 buri joro, nk’uko bivugwa n’umukozi, wavuye ku bantu 2000 mu ntangiriro z’ukwezi kwa Karindwi.

Kompanyi ishinzwe uyu muyoboro yavuze ko ingamba zisumbuye z’umutekano zashyizweho ziri kugira icyo “zihindura gifatika”.

Ariko yavuze ko umubare w’abagerageza kunyura mu muyoboro “utakwemerwa.”

Abimukira mu mujyi wa Calais bamara amajoro bagerageza kwambuka umuyoboro bajya mu Bwongereza, bigatera ubukerererwe ku nzira zimwe za gari ya moshi.

Uwufise ububasha kw’isanamu AFP
Image caption Abambuka bagabanutse ugereranyije n'ukwezi gushize kwa Karindwi

Guverinoma y’ Ubwongereza ivuga ko iri gukoresha amafaranga miliyoni zirindwi z’ama pawundi (£7.000.000) mu kongera umutekano kuri uwo muyoboro, ariko ikanemera ko hakiri akazi ko gukora.

Kongera urukuta, rutanzweho amafaranga n’u Bwongereza, rwamaze kubakwa, rugamije gutuma bikomerera abimukira kugera ku muyoboro no kuri gari ya moshi.

Ibindi byuma bifata amashusho (CCTV), utwuma tubona abantu kubera intambuko, ndetse n’urumuri nabyo byashyizwe ku rukuta mu rwego rw’umutekano.

Uwufise ububasha kw’isanamu AFP
Image caption Ibihumbi by'abimukira biri kuba mu duhema tuzwi nk'indake i Calais

Ku wa Gatandatu, Minisitiri w’Intebe, David Cameron yashyigikiye uburyo guverinoma y’Ubwongereza iri kwitwara muri iki kibazo cy’abimukira I Calais, atsindagira ko iri kwizeza ko nta bimukira batemewe n’amategeko “ batoborera mu Bwongereza”.

Abategetsi bagereranya ko abantu ibihumbi magana abiri na mirongo itanu bashobora kuba barambutse banyuze mu bwato uyu mwaka, bajya mu Burayi.