Siriya: Igitero ku isoko cyishe abantu 80

Uwufise ububasha kw’isanamu AFP
Image caption Bamwe mu bakomeretse byabaye ngombwa ko bavurirwa mu mavuriro y'inkambi

Impirimbanyi z’uburenganzira bwa muntu ziravuga ko abantu 80 bapfuye nyuma y’ibitero bya guverinoma mu isoko riri mu mujyi wa Douma ugenzurwa n’inyeshyamba, hafi ya Damascus.

Abakabakaba 200 baravugwa ko bakomerekeye muri iki gitero.

Mu mezi ya vuba ashize, ingabo za guverinoma zimaze igihe zitera umujyi wa Douma ugenzurwa n’inyeshyamba n’utundi duce tuhakikije, zikoresheje kajugujugu zimisha ibibombe.

Abasiviri babarirwa mu majana bapfanye n’abarwanyi.

Uwufise ububasha kw’isanamu Reuters
Image caption Impirimbanyi zivuga ko Douma yibasiwe n'ibitero bya guverinoma- Aha ni nyuma y'igitero cyo ku wa 12 z'ukwa Munani.

Amashusho yafashwe n’impirimbanyi z’uburenganzira bwa kiremwa muntu, avugwa ko ari aya nyuma y’ibitero, yerekanye isoko ryashwanyujwe burundu, inzu zihaturiye ari ibisigazwa n’imodoka ziri gushya.

Umuhuzabikorwa w’umuryango w’impirimbanyi, zirwanya Leta, yavuze ko abakozi b’ubutabazi bari gucukura mu bisigazwa by’inyubako bashaka ababa barokotse.

Impirimbanyi iri i Douma yabwiye ibiro ntaramakuru AP ko ibintu bimeze “nabi cyane”, yongeraho ko amavuriro muri ako gace yuzuye kandi ko benshi mu nkomere bari gushushubikanywa kwa mu ganga mu modoka z’abasivili kubera ko imodoka zitwara indembe zarengewe n’akazi.

Uwufise ububasha kw’isanamu youtube
Image caption Amashusho yerekana ibyangijwe n'igitero cyagabwe ku isoko yashyizwe kuri Youtube

Iki gitero gihuriranye n’uruzinduko rwa mbere rw’umuyobozi w’urwego rw’ubutabazi muri LONI, Stephen O’Brien, kuva yafata uyu mwanya mu kwezi kwa Gatanu.

Abanyamakuru baravuga ko Douma, iherereye mu bilometero 11 uvuye i Damascus rwagati yamye yibasirwa n’ibitero byo mu kirere bya guverinoma bigamije guhagarika inyeshyamba kugaba ibisasu bya rokete mu Murwa Mukuru, ndetse n’umutwe w’inyeshyamba z’abarwanyi ba kiyisililamu wa Jaysh al-Islam.