Misiri yamaganye abayinenga

Muri 2014 abo banyamakuru bari bakatiwe ibihano biremereye. Uwufise ububasha kw’isanamu AP
Image caption Muri 2014 abo banyamakuru bari bakatiwe ibihano biremereye.

Minisiteri y'ububanyi n'amahanga ya Misiri yamaganye amahanga akomeje kuyinenga nyuma yaho kuwa gatandatu urukiko rwaho rukatiye abanyamakuru 3 ba Televiziyo ya Al-Jazeera igihano cyo gufungwa imyaka itatu.

Umuvugizi w'iyo minisiteri yavuze ko mu gihugu hari abanyamakuru babarirwa mu bihumbi bakora mu bwisanzure bwuzuye.

Ambasaderi w'Ubwongereza mu Misiri ubutegetsi bwamuhagaye ngo yisobanure ku magambo yavuze anenga icyemezo cy'urukiko.

Abo banyamakuru batatu bashinjwaga gukwirakwiza amakuru y’ibihuha; mu rubanza rwari rusubiwemo.

Mohamed Fahmy ufite ubwenegihugu bwa Misiri na Canada n’umunya Misiri Baher Mohamed bahise basohokanwa mu rukiko nyuma y’umwanzuro w’umucamanza.

Umunya Australia Peter Greste we ntabwo yari mu rukiko kuko yoherejwe mu gihugu cye mu ntangiriro z’uyu mwaka.

Abo bose uko ari batatu bahamijwe icyaha cyo gufasha umutwe wa politiki wa Muslim Brotherhood ariko bo barabihakana.

Uko ari batatu kandi bari barakatiwe mu rubanza rwa mbere umwaka ushize.

Bwana Greste na Bwana Fahmy bari bakatiwe imyaka 7 naho Bwana Mohamed we akatirwa imyaka 10.

Ariko ibyo bihano byagizwe impfabusa mu kwezi kwa mbere muri uno mwaka maze barekurwa mu kwa kabiri bategereje ko urubanza rusubirwamo.