Tchad yanenzwe kubera kwica intagondwa

Iki ni igihe abo bantu bari mu rukiko kuwa 28 kuwa munani. Uwufise ububasha kw’isanamu AFP
Image caption Iki ni igihe abo bantu bari mu rukiko kuwa 28 kuwa munani.

Umuryango uharanira uburenganzira bw’ikiremwamuntu, Amnesty International, wamaganye igihano cy’urupfu cyashyizwe mu bikorwa muri Tchad kuwa gatandatu.

Icyo gihano cyari cyarakatiwe abantu 10 bahamijwe icyaha cyo kuba baragize uruhare mu bitero by’iterabwoba byagabwe n’umutwe wa Boko Haram muri Tchad.

Umuvugizi wa Amnesty International, Alioune Tine, yavuze ko kwica abo bantu ari intambwe isura inyuma.

Yongeyeho ko igihugu kigendera ku mategeko kitagombye kwitwara nk’abo kita abakora ibikorwa by’iterabwoba.

Amnesty International inenga kandi urubanza rw’abo bantu rwamaze gusa iminsi itatu kandi rukabera mu ibanga.

Izo ntagondwa zari zarakatiwe kubera uruhare rwazo mu gitero cy'abiyahuzi babiri cyabereye mu murwa mukuru N'Djamena mu kwezi kwa gatandatu.

Abantu barenga 40 bahitanywe n'ibitero by'abiyahuzi i N'Djamena mu kwezi kwa gatandatu n'ukwa karindwi.

N'Djamena iri ku birometero hafi 100 uvuye ku mupaka wa Nigeria aho umutwe wa Boko Haram wigometse kuri leta kuva muri 2009.