DRC: urugomo muri mitingi y'abatavuga rumwe na leta

Perezida Joseph Kabila ari ku butegetsi kuva muri 2001. Uwufise ububasha kw’isanamu AFP
Image caption Perezida Joseph Kabila ari ku butegetsi kuva muri 2001.

Muri Repubulika iharanira demokarasi ya Congo habaye ibikorwa by'urugomo mu gihe abatavuga rumwe na leta bari bakoraniye muri mitingi mu murwa mukuru Kinshasa.

Abantu babarirwa hagati y'ibihumbi bibiri na bitatu bari bakoranye kugirango bamaganye gahunda bavuga ko Perezida Joseph Kabila afite yo kuguma ku butegetsi nyuma yaho manda ye irangiriye mu mwaka utaha.

Umunyamakuru wa BBC uri i Kinshasa aravuga ko iyo mitingi yajemo akajagari maze abantu benshi bariruka kubera ubwoba bavuga ko abashyigikiye leta bari babinjiyemo.

Umugabo umwe yakubiswe bikomeye n'abantu benshi batekereza ko ari umwe mu bagize urubyiruko rw'ishyaka riri ku butegetsi.

Mu cyumweru gishize, urukiko rushinzwe kubahiriza itegeko nshinga rwasabye ko ingengabihe y'amatora isubirwamo.

Iki cyemezo cyatumye abatavuga rumwe na leta bavuga ko aya ari amayeri yo kugirango Perezida Joseph Kabila agume ku butegetsi manda ye irangiye.

Mu kwezi kwa mbere, imyigaragambyo yamagana umushinga w'itegeko - wafatwaga nkaho ugamije gutinza amatora - yaranzwe n'ibikorwa by'urugomo byaguyemo abantu byibura 36.

Mu nyuma igice cy'uwo mushinga w'itegeko cyarivanwemo none ubungubu abakuru b'abatavuga rumwe na leta barakeka ko hariho undi mugambi wo gutinza amatora.

Perezida Joseph Kabila yageze ku butegetsi muri 2001 ise amaze kwicwa.

Itegeko nshinga rya Congo rivuga ko nta mukuru w'igihugu ugomba kurenza manda ebyiri ku butegetsi.