Ibitero by'Ubufaransa kuri IS

Ubufaransa busanzwe bugaba ibitero kuri IS muri Irak. Uwufise ububasha kw’isanamu AFP
Image caption Ubufaransa busanzwe bugaba ibitero kuri IS muri Irak.

Ubufaransa bwatangiye kugaba ibitero by'indege ku nyeshyamba zo mu mutwe wa Leta ya Kiyisilamu (IS) muri Syria mu cyo bwise igikorwa cyo kwitabara.

Ministri w'intebe w'Ubufaransa, Manuel Valls yavuze ko ibyo bitero byibasiye ibigo intagondwa zo muri uwo mutwe zitorezamo zitegura kugaba ibitero ku Bufaransa.

Ibiro by'umukuru w'igihugu i Paris byavuze ko Ubufaransa bushobora kugaba ibitero igihe icyo ari cyo cyose igihe umutekano wabwo ubangamiwe.

Ubundi Ubufaransa bwagabaga ibitero gusa ku mutwe wa IS muri Irak aho ufite n'akarere wigaruriye.

Ubufaransa busanze ibindi bihugu nka Leta zunze ubumwe za Amerika n'ibindi bihugu by'abarabu bimaze umwaka urenga bigaba ibitero ku mutwe wa Leta ya Kiyislamu muri Syria.