Itegeko nshinga ry'Urwanda riragana ihinduka

Ako kanama kari kamaze igihe kitagera ku kwezi gashyinzwe kugira gategure uwo mushinga.

Uyu mushinga uvuga ko umukuru w'igihugu atorerwa igihe cy'imyaka 7 ariko ntusobanura inshuro ntarengwa.

Mbere yo kwemeza agaciro k'uyu mushinga bamwe mu badepite bagaragaje impungenge z'uko utagaragaramo umwihariko wa Perezida uriho ubu, kandi bemeza ko abaturage basabye ko nyuma ya President Kagame ibintu byakongera gusubirwamo.

Nubwo iri vugururwa rireba ingingo zitandukanye z'itegeko nshinga, ingingo yaryo ya 101 ni yo yakunze kugaragara nk'igenderewe.

Mu itegeko ryariho, iyi ngingo ivuga ko umukuru w'igihugu atorerwa imyaka 7 ivugururwa inshuro imwe gusa.

Uwufise ububasha kw’isanamu

Mu gihe President Kagame yari ashigaje imyaka 2 gusa, abadepite bavuga ko bakiriye inyandiko z'abaturage bakabakaba miliyoni 4 basaba ko iyi ngingo yakurwaho, Perezida uriho akongera kwemererwa kwiyamamaza.

Ikindi ngo abaturage bifuzaga ko ibi byakwemererwa Kagame wenyine, nyuma imyaka ikaba yagumishwa uko iri cyangwa ikaba yagabanywa.

Nyamara rero, umushinga wamuritswe uvuga ko umukuru w'igihugu atorerwa imyaka 7 ishobora kongerwa mu gihe kitavuzwe.

Uko bigaragara, uyu mushinga urasa n'udafite intambamyi n'imwe bikaba byitezwe ko ugomba gusozwa n'ihamagazwa ry'itora rya Kamarampaka.

Itegeko nshinga ry'Urwanda rimaze kuvugururwa ubugira kane mu gihe cy'imyaka 12 gusa rimaze ritowe.

Nyinshi mu ngingo zarahindutse ku buryo hari n'abasanga ryarahindutse ku rugero rurenga 50%.

Bamwe mu badepite bifuje ko iri vugurwa ryatekereza ku gihe kirekire kiri imbere kugira ngo itegeko nshinga ridakomeza gukorwaho bya hato na hato.