Konti za maison Shalom 'zafunzwe'

Image caption Madamu Maggy Barankitse azwi cyane mu Burundi kubera ibikorwa byita ku bana batagira kivurira

Ubushinjacyaha bw’Uburundi bwahagaritse konti z’umuryango ufasha “Shalom” uyoborwa na Maggy Barankitse, ubu uvuga ko yahunze u Burundi.

Madamu Barankitse avuga ko uwo muryango usanzwe ufite ibikorwa bitandukanye birimo ibitaro ndetse n’ikigo cy’imfubyi, ubu ibyo bikorwa bias n’ibyahagaze.

Maggy yabwiye BBC Gahuzamiryango ko icyemezo cyo guhagarika konti za Shalom cyafashwe n’umushinjacyaha mukuru.

“Naciye ngira agahinda, ndumirwa numva mfise n’isoni kandi birateye n’ubwoba”

Madamu Barankitse yavuze ko ‘atazi neza’ impamvu yateye ubushinjacyaha guhagarika konti z’ibikorwa bye.

Yagize ati: “Ukwibarira ni ko kubesha. Byanditse mu gifaransa ngo batange historique (imikoreshereze) y’ayo makonti [abakozi]...Iyo dosiye ntacyo bavuze ngo dosiye yerekeye ibi.”

Umuyobozi w’ikigo Shalom ari ku rutonde rw’abantu bashakishwa n’ubutegetsi mu Burundi kubera ibirego byo gufasha ibikorwa by’imigumuko. Ariko ahakana ko nta ruhare abifitemo.

Yongeyeho ati:

“Dufise ubutumwa bwo kuraba imbabare, ntidufise ubutumwa bwa politike.”

Barakankitse ahakana ko atagira uruhare muri politike. Ariko aherutse kugaragara kuri televiziyo muri Canada anenga bikomeye ubutegetsi mu Burundi akoresha amagambo aremereye.

Yasobanuye ko ibyo yavuze yabitewe no kubona abana bapfa akavuga ko ‘bicwa n’ubutegetsi’ buriho.

Twagerageje kuvugana n’ubushinjacyaha mu Burundi ariko ntibyadukundiye kugeza igiye iyi nkuru yandikwaga.