Burundi: AU muri gahunda yo kohereza ingabo

Uwufise ububasha kw’isanamu AFP
Image caption Perezida Pierre Nkurunziza yatsinze amatora yateje impaka

Akanama gashinzwe amahoro n’umutekano mu Muryango w’Ubumwe bwa Afurika katangaje ko kazashyigikira ibiganiro by'amahoro mu Burundi.

Ibyo biganiro bizaba hagati y’impande zose zishyamiranye mu Burundi kugira ngo haboneke igisubizo ku mvururu.

Uwufise ububasha kw’isanamu
Image caption Imvururu zatangiye mu kwezi kwa Kane zimaze kwica abagera kuri 200

AU izanategura gahunda yihutirwa yo gutabara mu buryo bwa gisirikare ibintu biramutse bikomeje gukomera.

Ambasaderi Smail Chergui akaba na komiseri mu kanama k’amahoro n’umutekano muri AU. Avuza ku ngingo y’ibihano yagize ati:

”Uwo ari we wese uri inyuma y’imvugo ishyushye ishobora gutuma ibintu bizamba kurushaho. Abo bose bari inyuma y’ubwicanyi bazabibazwa.”

Uwufise ububasha kw’isanamu AFP
Image caption Imyigaragambyo yamagana manda ya gatatu yateye imvuru zavuyemo imfu za benshi

Yavuze ko AU ihangayikishijwe cyane n’ikibazo cy’izahara ry’umutekano ndetse n’izahara ry’amahoro mu Burundi. Ubwicanyi bukomeje gukorwa.

Umuryango w’Ubumwe bwa Afurika kandi wahamagariye Leta n’uruhade rutavuga rumwe nayo kubaha uburenganzira bwa kiremwamuntu no gukora ibishoboka mu guhagarika ubwicanyi bukorerwa abaturage. Yasabye kandi ko bubaha uburyo bw’ibiganiro bihuriwemo n’impande zose.

Leta y'u Burundi ivuga ko muri rusangi ishima icyemezo cyatowe ku wa Kane n'akanama ka LONI gashinzwe umutekano, ku bibazo bya politike n'umutekano biri mu Burundi. Icyo cyemezo cyatowe ku gitecyerezo cy’ Ubufaransa, cyateje impaka hagati y'ibihugu bitanu bifite ijambo rihoraho muri ako kanama kugeza habonetse umwanzuro wumvikanyweho na bose.

Uwufise ububasha kw’isanamu
Image caption Ibikorwa by'imyivumbagatanyo byavuyemo ubwicanyi n'urugomo

Ushizwe kumenyesha amakuru mu biro by'umukuru w'Uburundi, Willy Nyamitwe, yavuze ko icyemezo gishya cyatowe na LONI cyubaha ubusugire bw’igihugu.

Yavuze ko ibiganiro bisabwa na LONI ndetse na AU bitareba CNARED ari nk’umugani.

Leta ishinja umutwe wa CNARED kuba inyuma y’ubwicanyi bubera mu Burundi ndetse ikaba inakurikiranye bamwe mu bawugize mu rwego rw’ubucamanza.

Ibirego uyu mutwe uhakana.

Yagize ati: ”Abazoja muri ibyo biganiro ni Abarundi bose baba abari mu gihugu cyangwa hanze y’igihugu ariko badafite uruhare mu bwicanyi bwabaye mu Burundi.”

Uwufise ububasha kw’isanamu Reuters
Image caption Inzego z'umutekano zakomeje guhangana n'abamagana ubutegetsi bwa Pierre Nkurunziza

Hagati aho, abanye politike batavuga rumwe na leta y'Uburundi bari haze y'igihugu, bahuriye mu cyo bise CENARED, ngo nabo icyemezo cy'akanama ka LONI bacyakiriye neza. Ariko, Umuvuvugizi wungirije muri CNARED, Pancras Cimpaye, yabwiye BBC Gahuzamiryango ko ngo leta y'Uburundi icyumva nabi.

Yagize ati: ”Iyo ngingo yafashwe ibwira ubutegetsi bw’i Bujumbura y’uko nyabuna bugomba kugira ibiganiro n’abo batavuga rumwe.”

Uwufise ububasha kw’isanamu AP
Image caption Imvururu zatumye benshi bahunga ingo zabo mu Burundi

Yongeyeho ati: ”Ibiganiro bigomba kuba hagati y’abafise ico bapfa. Ibiganiro bigomba kuba hagati y’abihagiye ubutegetsi ku nguvu n’abanyapilitike batawe hanze...abo nabo bakaba bahurikiye muri CNARED.”

Bwana Cimpaye yasobanuye ko Leta niyanga kujya mu biganiro nabo, bazasaba amahanga gufata ibihano biremereye.

Ibindi kuri iyi nkuru