Umuyobozi wa IS muri Libiya 'yishwe n'igitero cya Amerika'

Uwufise ububasha kw’isanamu AFP
Image caption Indege ebyiri zo mu bwoko bwa F-15 zakoreshejwe mu gitero

Igitero cy’indege cyagabwe na Amerika cyibasiye umuyobozi wa IS muri Libiya ndetse ubanza cyanamwishe, byatangajwe na minisiteri y’ingabo.

Minisiteri y’ingabo, Pentagon, yavuze ko umunya Iraki Abu Nabil, uzwi ku izina rya Wissam Najm Abd Zayd al-Zubaydi, yari umuntu umaze igihe kirekire akorera al Qaeda. Igitero cyagabwe ku wa Gatanu kibasira inyubako iri mu gace ka Derna.

Pentagon yavuze ko igitero cyerekanye ko izahiga abayobozi ba IS ”aho bakorera hose”.

"Guca intege IS"

Ibiro ntaramakuru byanditse amagambo yatangajwe n’abategetsi ba Leta Zunze Ubumwe za Amerika bavuga ko bizeye neza ko Nabil yishwe.

Umuvugizi wa minisiteri y’ingabo, Peter Cook wakoresheje izina ritandukanye ry’uyu mutwe yagize ati:

”Urupfu rwa Nabil ruzaca intege ubushobozi bwa Isil mu kugera ku ntego z’uyu mutwe muri Libiya, zirimo no kwinjiza abambari bashya muri Isil, gushinga ibirindiro muri Libiya, no gutegura ibitero byibasira Amerika”

Yavuze ko icyo gitero cyari cyemejwe mbere y’ibitero byagabwe i Paris ku wa Gatanu nijoro byigambwe n’umutwe wa IS.

Cook yongeyeho ko Nabil ashobora kuba ari umuvugizi wa IS wafotowe mu mashusho yo mu kwezi kwa Kabiri 2015 yerekanaga iyicwa ry’abakirisitu b’abakobute (Coptic) muri Libiya.

Uwufise ububasha kw’isanamu Screengrab
Image caption Abarwanyi ba IS bafashe Derna mu mwaka ushize ariko batsimbuwe bikomeye mu kwezi kwa Karindwi n'abahatuye b'imitwe ya kiyisilamu

Libiya iracyari mu kaduruvayo nyuma y’imyaka ine Muammar Gaddafi ahiritswe ku butegetsi, kandi igihugu kiracyarwanirwa n’imitwe myinshi irimo ba IS.

Yagabye ibitero bikomeye muri iki gihugu cyo mu majyaruguru ya Afurika kirimo ibura ry’ikurikizwa ry’amategeko ndetse yanigaruriye imijyi myinshi ikomeye irimo na Sirte.

Pentagon yavuze ko igitero cyagabwe kuri Nabil ni icya mbere kibasiye umuyobozi wa IS muri Libiya.

Ibiro ntaramakuru bya Reuters byatangaje ko umutangabuhamya yavuze ko ibitero byabereye mu gace kagenzurwa n’abarwanyi ba Islamic State I Derna mu nkengero z’amajyepfo y’uburasirazuba bwa Fattayah.