Ibitero by'i Paris: 24 bakekwa bafashwe

Uwufise ububasha kw’isanamu Reuters

Inama ishinga amategeko y'Ubufaransa igiye gusabwa kwongera amezi atatu ibihe bidasanzwe mu gihugu nyuma y'ibitero byabaye kuwa gatanu i Paris ku murwa mukuru waho.

Umukuru w'igihugu Francois Hollande yabwiye inteko zombi ziteranye ko itegeko nshinga rigomba guhinduka kugirango babone uko barwanya iterabwoba. Prezida Hollande yavuze ko ibyo bitero byateguriwe muri Syria bihagurukira mu Bubiligi.

Abantu 24 batawe muri yombi ndetse n’intwaro zitandukanye zifatirwa mu bitero byagabwe ku bakekwa kuba abarwanyi b’umutwe wa kiyisilamu mu Bufaransa.

Abategetsi bavuze ko uwo mukwabu wakurikiye ibitero byagabwe ku tubari, resitora ndetse n’inzu y’imyidagaduriro na sitade I Paris mu Bufaransa ku wa Gatanu, mu bitero byishe abantu 129.

Hari n’amakuru y’umukwabu wa polisi mu Bubiligi, mu murwa mukuru Buruseli, aho umuntu umwe ukekwa yatawe muri yombi.

Minisitiri w’intebe Manuel Valls yavuze ko ibitero byateguriwe muri Siriya. Yongeryeho ko abategetsi bizera ko ibindi bitero byategurwaga kwibasira Ubufaransa no mu bindi bihugu by’Uburayi.

Uwufise ububasha kw’isanamu AFP

Umutwe wa Leta ya kiyisilamu watangaje ko wari inyuma y’igitero cy’imbunda na bombe cyo ku wa Gatanu cyagabwe mu nzu y’urunywero mu mujyi wa Paris, mu cyumba cy’imyidagaduro ndetse no kuri sitade.

Barindwi mu bagabye igitero barapfuye hafi ya bose bamaze kwiturikirizaho ibisasu.

Abakekwa mu gitero cya Paris:

• Salah Abdeslam, imyaka 26 –arashakishwa bikomeye n’igipolisi

• Mohammed Abdeslam – biravugwa ko yaba yarafatiwe mu Bubiligi

• Brahim Abdeslam– imyaka 31 – bivugwa ko ari umwe mu bagabye igitero waguye hafi y’inzu y’ibitaramo ya Bataclan.

• Omar Ismail Mostefai, imyaka 29, uturuka hafi y’umujyi wa Paris - yahitanywe n’igitero cya Bataclan

• Bilal Hadfi, 20 – bivugwa ko uyu ari umwe mu bateye waguye kuri Stade de France

• Abandi bane mu bagabye igitero baguye mu bitero bindi byabereye mu mujyi wa Paris.

Uwufise ububasha kw’isanamu APTN

Salah Abdeslam, igipolisi gifata nk’uri ku isonga y’abakekwa, bivugwa ko yakodesheje imodoka yo mu bwoko bwa VW Polo yatahuwe hafi y’inzu y’imyidagaduro ya Bataclan ahaguye abantu 89. Iyi modoka kandi ikaba ikekwa kuba yaba yarifashishijwe n’abagabye ibitero.

Ku wa Gatandatu ngo yari kumwe n’abandi bantu babiri mu modoka hafi y’umupaka w’Ububiligi, bahagaritswe n’abapolisi ariko ngo baza kurekurwa nyuma y’igenzura.

Ntibiramenyekana niba abategetsi b’Ubufaransa bari bashoboye gutahura isano hagati y’uyu mugabo n’iyi modoka ubwo yahagarikwaga.

Igipolisi cyavuze ko Salah Abdeslam ari umuntu mubi cyane, kigira inama abantu bose kwirinda kumwegera .

Televiziyo ya IBFMTV, yavugaga ko ikesha amakuru inzego zikora iperereza yavuze ko uyu mugabo kimwe n’undi umwe mu bagabye igitero bari basanzwe bakurikiranirwa hafi n’inzego z’ubutegetsi.

Uwufise ububasha kw’isanamu Others
Image caption Uyu ni Abdeslam Salah ukekwa bikomeye

Abategetsi bavuga ko uyu ari umwe mu bavandimwe batatu baba mu Bubiligi bafitanye isano n’igitero cyo kuwa Gatanu .

Undi, Brahimi Abdeslam, w’imyaka 31, bivugwa ko yiturikirije hanze y’inzu y’ubunywero ku muhanda witiriwe Voltaire, ahegereye Bataclan agakomeretsa umuntu umwe.

Uwa gatatu muri aba bavandimwe. Mohammed, bivugwa ko yafatiwe mu nkengero z’umurwa mukuru wa Buruseli, mu mujyi witwa Molenbeek ubwo yari avuye I Paris, ubu akaba akiri mu munyururu.

Igipolisi cy’UBubiligi: Abantu 7 batawe muri yombi

Abategetsi bavuga ko aba bavandimwe batahuwe nyuma yo kubona imodoka ebyiri zakodeshejwe, zifite ibyangombwa by’UBubiligi –ya VW Polo, yakodeshejwe na Salah Abdeslam yatahuwemo imbunda yo mu bwoko bwa Kalashnikov irasa urufaya yatahuwe mu gace ka Montreuil kari mu nkengero z’umujyi wa Paris.

Umwe muri batatu baguye kuri Stade de France nyuma yo kwiturikirizaho igisasu, itangazamakuru rivuga ko ari Bilal Hadfi, uri mu kigero cy’imyaka 20. Ngo yabaye mu Bubiligi kandi nawe BFMTV ikavuga ko yari asanzwe akurikiranirwa hafi n’inzego z’Ububiligi.

Ikibazo cy’ingutu

Minisitri w’intebe w’Ububiligi , Charles Michel, yavuze ko abategetsi b’iki gihugu bagiye gufatira ingamba agace ka Molenbeek kamaze kumeyakana nk’indiri y’intagondwa.

Agira ati: “Nakomeje kubona ibimenyetso ko aka gace ka Molenbeek karimo ikibazo gikomeye.”

Undi washoboye gutahurwa mu bagabye igitero ni Umufaransa, Omar Ismail Mostefai w’imyaka 29 witurikirijeho ibisasu I Bataclan.

Yari asanzwe azwi ku rutonde rw’abanyabyaha, inzego z’ubutasi z’Ubufaransa zikaba zamukekagaho kuba intagondwa ikabiriza amahame y’idini ya Islam ashobora kuba yaramaze muri Syria igihe runaka.

Igipolisi kivuga ko amakuru ku myitwarire ye y’ubuhezanguni yari yongeye kuvugururwa mu kwezi kwa 10, ariko ngo ibi ntibivuze ko yahise atangira kugenzurwa bya hafi.

Abapolisi kandi ngo barakora iperereza ku rupapuro rw’inzira rwatangiwe muri Siriya rwatahuwe kuri Stade de France ahabareye igitero, ruriho amazina y’umuntu winjiye nk’impunzi avuye mu Bugereki akaza gusaba ubuhungiro muri Seribiya.

Uwufise ububasha kw’isanamu Reuters

Isesengura: Gordon Corera, umunyamakuru wa BBC mu birebana n’umutekano

Abakozi b’Ubufaransa bakora iperereza baragenzura umuhora mpuzamahanga mu Burayi bwose –bashaka kumenya ubushobozi bwa IS imaze kugeza kuri uyu mugabane bwo kuba yakongera gukora ishyano nk’iryo mu mujyi wa Paris.

Hari amakuru ariko ataremezwa neza avuga ko ibindi bitero byari byateguriwe kubera igihe kimwe mu gihugu cy’Ubugereki ariko byo bikaburizwamo bitaraba.

Gutahura abateguye ibi bitero bya Paris yaba ari intambwe ikomeye yatuma hatahurwa n’ibindi byategurwaga. Ni ikintu gikomeye.

Abagabye ibi bitero ntibagaragara gusa nk’abacengewe n’amatwara ya IS ahubwo ngo bashobora kuba aria abantu bahawe imyitozo ihambaye mu bikorwa nk’ibi .

Ikindi kuba inzego z’iperereza z’ Uburayi zitarashoboye gutahura kare iyi migambi nyamara zifite inzobere n’ikoranabuhanga na byo birongera impungenge.

Uwufise ububasha kw’isanamu Reuters

Umukuru w’Ubufaransa, Francois Hollande, yavuze ko ibi bitero ari ibikorwa by’intambara kandi ko igubizo cy’Ubufaransa kuri byo kizaza kitajenjetse.

Minisiteri y’ingabo y’Ubufaransa ivuga ko Ku Cyumweru, indege 10 z’intambara zifite ibirindiro muri Jorudaniya na UAE zamishe ibisasu biremereye 20 mu duce tune twa Raqqa.

Uwufise ububasha kw’isanamu AP

Ibindi kuri iyi nkuru