Kenya: Abantu baheze mu mubyigano w'amakamyo

Uwufise ububasha kw’isanamu NTV
Image caption Abantu bamwe bamaze amasaha 48 baheze mu bubyigano w'amakamyo

Abanya Kenya baheze mu kivunge cy’imodoka “Km 50” ku muhanda wa Nairobi - Mombasa.

Abapolisi ba Kenya boherejweyo kugira ngo bafashe muri icyo kibazo, aho bivugwa ko umurongo w’imodoka ugera ku bilometero 50 kuri uwo muhanda.

Uyu muhanda usanzwe ari ingenzi cyane mu bijyanye n’ubukungu bw’Akarere ka Afurika y’Uburasirazuba kubera ko uhuza icyambu cya Mombasa n’ibihugu bidafite aho bihurira n’inyanja nk’u Rwanda, Uganda, na Sudani y’Epfo.

Agace kibasiwe cyane ni ahitwa Taru, ku bilometero 80 (Km 80) uvuye i Mombasa. Abanyamakuru bavuga ko uwo murongo w’imodoka watewe n’imirimo yo gusana umuhanda nyuma y’uko wari umaze kwangizwa n’imvura nyinshi.

Uwufise ububasha kw’isanamu Daily Nation
Image caption Umuhanda ugana i Nairobi ni wo wonyine ufite ikibazo
Uwufise ububasha kw’isanamu NTV
Image caption Bamwe baheze kure mu bilometero byinshi uvuye ahari iduka

Ubusanzwe imirongo y’imodoka nyinshi iramenyerewe muri Kenya, kenshi igaterwa n’uko imihanda ititabwaho nk’uko bikwiye, ariko ibyabaye muri iki gihe byo birabakije ku buryo hari hashize imyaka myinshi bitagaragara.

Willingtone Kiberenge, umuyobozi w’agateganyo w’urwego rwa Kenya rushinzwe gutwara abantu yabwiye ibiro ntaramakuru, Reuters ko imodoka z’amakamyo 1.500 zaheze aho.

Bamwe mu bashoferi baheze mu biturage, ku bilometero byinshi uvuye ku iduka rya hafi, kuva icyo kibazo cyatangira kuva ku wa Kabiri nijoro.

Nathaniel Chwela utwara ikamyo wari unatwaye imodoka 10 azijyana i Kampala muri Uganda yabwiye Reuters ati: ”Kuva ejo mu gitondo nta kintu ndakoza mu kanwa, sindakaraba cyangwa se ngo mpindure imyambaro.”

Uwufise ububasha kw’isanamu NTV
Image caption Hagati ya Nairobi na Mombasa hari intera ya Km 500

Igice cy’umuhanda kigana i Nairobi ni cyo cyonyine gifite ikibazo.

Amwe mu makamyo yagerageje gushakisha inzira zinyura ahatari kaburimbo, ariko yahise ashaya mu cyondo.

Uwufise ububasha kw’isanamu NTV
Image caption Muri Kenya haguye imvura nyinshi muri icyi cyumweru

Umunyamakuru wa BBC i Nairobi, Muhammud Ali Mohamed, avuga ko hari inzira ya gari ya moshi iri hagati ya Mombasa na Nairobi, ariko ngo irashaje, ntiyizewe kandi bifata iminsi myinshi kugira ngo hakorwe urwo rugendo rw’ibilometero 500 (Km500).

Ku babishoboye, kandi badafite imizigo iremereye bakunze gukoresha indege bava mu mijyi imwe bagana mu yindi, kuko amasaha yose indege ziba zigenda.

Bifata igihe cyingana iki kuva i Nairobi ujya i Mombasa?

Uwufise ububasha kw’isanamu .
  • Kugenda na bisi: Amasaha icyenda
  • Kugenda n'ikamyo: Umunsi urenga umwe
  • Kugenda n'imodoka: Hagati y'amasaha atandatu n'arindwi
  • Kugenda n'indege: Iminota 45