Amerika yabujije abaturage bayo kujya mu Burundi

Uwufise ububasha kw’isanamu AFP
Image caption Imvururu za politike zimaze igihe zikaze mu Burundi

Amerika yaburiye abaturage bayo kutajya mu Burundi mu gihe imvururu za politike zikomeje.

Itangazo ryasohotse ku Cyumweru riburira Abanyamerika baba mu Burundi kuhava ‘mu gihe cya vuba gishoboka’.

Igisirikare cyavuze ko ku wa Gatanu, abantu 87 bishwe mu bitero bitatu byagabwe ku birindiro bitatu bya gisirikare.

Umuryango uharanira uburenganzira bwa kiremwa muntu, Human Rights Watch, ukorera muri Leta Zunze Ubumwe za Amerika wasabye ko haba iperereza kuri ubu bwicanyi.

Image caption Imvururu ziri mu Burundi zateye benshi guhunga

Imyigaragambyo yatangiye mu kwezi kwa Kane igihe perezida Pierre Nkurunziza yatangazaga ko aziyamamaza ku nshuro ya gatatu.

Mu kwezi gushize, Ububiligi bwasabye abaturage babwo kuva mu Burundi, mu gihe Umuryango w’Ubumwe bw’ibihugu by’Uburayi wagabanyije abakozi bawo, ikanacyura abakozi n’imiryango by’agateganyo.

Itangazo rya minisiteri y’ububanyi n’amahanga muri Leta Zunze Ubumwe za Amerika rigira riti:

“Kubera ikomeza ry’ubwicanyi, minisiteri y’ububabnyi n’amahanga yategetse abakorera guverinima ya Amerika n’abandi bakozi bakora imirimo itihutirwa cyane kuva mu Burundi.”

“Ambasade ya Amerika ifite ubushobozi bwo guha Abanyamerika, ubufasha bwihutirwa gusa.”

Image caption Imyigaragambyo yadutse ari myinshi

Itangazo ryanatanze inama ku baturage ba Amerika bashobora kwibasirwa n’imvururu, kuguma mu rugo, ahitaruye amadirishya n’inzugi.

Umuvugizi w’igisitikare, Col Gaspard Baratuza yavuze ko abantu 87 bishwe mu mirwano yabereye mu murwa mukuru ku wa Gatanu- avuga ‘abanzi’ 79 ndetse n’abasirikare n’abapolisi umunani. Abatangabuhamya babwiye AFP ko bamwe mu bishwe imbunda zabo ziboheye ku migongo.

Carina Tertsakian, umushakashatsi wa Human Rights Watch ku Burundi, yasabye icyo yise iperereza ricukumbuye kandi ryigenga kuri ubu bwicanyi.

Yagize ati: ”Ubu ni ubwicanyi bukomeye kugeza iki gihe, abishwe benshi cyane, kuva imvururu zatangira mu kwa Kane. Iperereza rishimitse kandi ryigenga riracyenewe byihutirwa mu kumenya uburyo aba bantu bishwemo.”

Umusesenguzi wa BBC Africa Richard Hamilton, yavuze ko imirambo igaragara ku mihanda buri munsi ariko ko ubu ai bwo bwicanyi buremereye mu ijoro rimwe kuva mu kwezi kwa Kane, nyuma y’umunsi umwe perezida Pierre Nkurunziza atangarije ko aziyamamaza ku nshuro ya gatatu.

Uwufise ububasha kw’isanamu Reuters
Image caption Benshi batawe muri yombi mu myigaragambyo

Bwana Nkurunziza yatanzwe n’ishyaka rye CNDD-FDD riri ku butegetsi, ibintu abatavuga rumwe nawe bavuga ko binyuranye n’itegekonshinga. Umuryango w’Abibumbye uvuga ko abantu bagera kuri 240 bamaze kwicwa abandi barenga 200.000 bahungiye mu bihugu bituranye n’Uburundi. Ibi byakuruye ubwoba bw’intambara y’umwiryane.

Uko ibintu byagenze mu matariki:

  • Mu kwa Kane 2015: - Imyigaragambyo yaradutse nyuma y’uko Pierre Nkurunziza atangarije ko aziyamamaza ku nshuro ya gatatu.
  • Mu kwa Gatanu 2015: - Urukiko rw’Ikirenga rwemereye Bwana Nkurunziza kwiyamamaza mu nkubiri y’uko abacamanza batewe ubwoba. Ibihumbi by’abantu bahunga umyivumbagatanyo n’imyigaragambyo.
  • Mu kwa Gatanu 2015: - Abasirikare bashatse guhirika ubutegetsi, birapfuba.
  • Mu kwa Karindwi 2015: - Amatora yarabaye, Bwana Nkurunziza arongera aratorwa. Amatora yateje impaka, umugabo utavuga rumwe na Leta Agathon Rwasa, ayasobanura nk’’urwenya.’
  • Mu kwa Cumi na Kumwe 2015 – Guverinoma y’Uburundi yahaye abamaganaga manda ya gatatu ya Nkurunziza, icyumweru kuba bashyize intwaro hasi mbere y’umukwabu wo kuzisaka.
  • Mu kwa Cumi na Kumwe 2015: - LONI yaburiye ko ifite ubushobozi buri munsi y’ubwo yari ifite muri jenoside mu Rwanda, mu gukumira imvururu zo mu Burundi.

Burundi: Iby'ingenzi

Igihugu cyugarijwe n'amakuba akaze kuva intambara y'umwiryane y'imyaka 12 yarangira mu 2005

  • Miliyoni 10.3 Abaturage

  • Imyaka 50 Uburambe k'umugabo

  • Nimero 2 Mu bihugu bikennye ku isi

  • 85% ni Abahutu, 14% ni Abatutsi

  • 300.000 Bishwe n'intambara y'umwiryane

AFP

Ibindi kuri iyi nkuru