Impanuka ya gari ya moshi yishe 9 mu Budage

Uwufise ububasha kw’isanamu Reuters

Gari ya moshi ebyiri zari zitwaye abagenzi zagonganiye muri leta ya Bavaria mu Budage, polisi iravuga ko abantu 9 bapfuye abandi benshi barakomereka.

Iyo mpanuka yabereye ahitwa Bad Aibling, mu mujyi uri mu bilometero 60 (Km60) uvuye mu majyepfo ya Munich.

Itangazamuru mu Budage riravuga ko imodoka nyisnhi zigize gari ya moshi zibirinduye. Polisi iravuga ko amatsinda y’ubutabazi ari kugerageza gutabara abaheze mu modoka za gari ya moshi.

Umuvugizi wa polisi, Stefan Sonntag, yabwiye ibiro ntaramakuru Associated Press ati: “Iyi ni impanuka ikomeye kurusha izindi tugize muri aka gace mu gihe cy’imyaka myinshi, kandi dufite abaganga b’ubutabazi bw’igitaraganya, imodoka zitwara indembe na kajugujugu biri ahabereye impanuka.”

Uwufise ububasha kw’isanamu AP
Image caption Impanuka yabereye hafi y'umupaka wa Austria

Yavuze ko gari ya moshi ebyiri zagonganiye mu nzira imwe hagati ya Rosenheim na Holzkirchen nyuma ya saa moya za mugitondo (06:00GMT).

Polisi yo muri ako gace yoherehe ubutumwa ku rubuga nkoranyambaga rwa twitter ko abantu bane bapfuye abandi bagera ku 100 barakomereka, 15 muri bo bameze nabi cyane naho abandi 40 bakomeretse bikomeye.

Uwufise ububasha kw’isanamu EPA
Image caption igikorwa cy'ubutabazi gikomeye kiri kuba

N’ubwo gari ya moshi yari itwaye abagenzi, amakuru aturuka mu Budage avuga ko iminsi mikuru y’ibiruhuko yizihizwa muri ako gace yatumye nta banyeshuri bari barimo. Impamvu yateye iyo mpanuka ntiramenyekana.

Uwufise ububasha kw’isanamu Reuters
Image caption Kajugujugu zatwaye abakomeretse ku bitaro

Imihanda yegereye ahabereye impanuka yafunzwe kandi inzira ya gari ya moshi hagati ya Holzkirchen na Rosenheim nayo yafunzwe.

Minisitiri w’Ubucamanza Heiko Maas yakoresheje Twitter agira ati “Amakuru ababaje cyane muri #badibling- Turazirikana abaguye mu mpanuka n’abakomeretse. Dushimira abakora ubutabazi.”