Amatora ya perezida yatangiye muri Centre Afrika

Uwufise ububasha kw’isanamu AP
Image caption Indorerezi ziravuga ko amatora abaye mu bihe bikomeye by'amateka ya Centre Afrika

Abaturage muri Repubulika ya Centre Afrika bari mu gikorwa cy’amatora y’umukuru w’igihugu ku nshuro ya kabiri.

Aya matora arabonwa nk’intambwe ikomeye yo kugarura amahoro, ituze ma guverinoma igendera ku bwisanzure.

Aya matora abaye nyuma y’uko umutwe w’inyeshyamba ziganjemo abo mu idini ya isilamu bafatiye ubutegetsi mu mwaka wa 2013, byateye kumena amaraso.

Abakandida bombi, uwahoze ari minisitiri w’intebe Faustin Touadera na Anicet Dologuele, basezeranyije kugarura umutekano no kuzamura ubukungu.

Bwana Dologuele yabaye muri guverinoma ya perezida Ange-Felix Patasse hagati ya 1999 na 2001, naho Bwana Touadera yari minisitiri w’intebe ku butegetsi bwa Francois Bozize hagati ya 2008 na 2013.

Uwufise ububasha kw’isanamu AP
Image caption Indorerezi zashimye ituze ryaranzwe n'amatora ya mbere mu kwa 12/2015
Uwufise ububasha kw’isanamu AP
Image caption Ibihumbi by'ingabo za LONI n'iz'Ubufaransa ziri kurinda umutekano

Hari ni icyizere ko aya matora ashobora guhindura amateka y’intambara y’umwiryane ashingiye ku madini. Ubwiyunge no kuzahura ubukungu bucumbagira biri mu ntego z’abiyamamaza.

Repubulika ya Centre Afurika ni kimwe mu bihugu birimo umutekano mucye ku isi kandi cyashotse mu manga y’ibibazo bya politike mu myaka itatu ishize igihe umutwe w’abarwanyi ba kiyislamu bitwa Seleka bahirikaga perezida Bozize ku butegetsi.

Abarwanyi b’abakristu basubije ibitero bya seleka batera imiryango y’abayisilamu.

Agace k’amajyaruguru y’uburasirazuba bw’igihugu kagenzurwa cyane n’inyeshyamba z’abayisilamu mu gihe abakristu bagenzura amagepfo y’uburengerazuba.

Abantu babarirwa mu bihumbi barapfuye abandi baturage batekerezwa kuba kimwe cya gatanu cy’abatuye igihugu cyose baravanywe mu byabo.

Uwufise ububasha kw’isanamu AFP
Image caption Anicet Georges Dologuele

Bwana Dologuele yasezeranyije abatora ko azazana agahenge kazahosha intambara imaze imyaka myinshi.

Agendera ku ntego igira iti:“Twunze ubumwe, tuzatsinda”.

Bwana Touadera abonwa n’abaturage bamushyigikiye nk’umunyamahoro ushobora kuziba icyuho hagati y’abayisilamu n’abakristu.

Uwufise ububasha kw’isanamu AP
Image caption Faustin Touadera

Ubwitabire bw’amatora y’icyiciro cya mbere bwageze ku kigero cya 80% mu kwezi kwa 12 umwaka ushize.

Indorerezi z’amatora zabonye ibi nk’ikimenyetso cy’uko abarurage bamaganye ibikorwa by’urugomo.

Ibindi kuri iyi nkuru