Kerry: Ibiganiro by'amahoro muri Siriya bigomba kuba

Uwufise ububasha kw’isanamu Reuters
Image caption Abantu bari mu duce tugenzurwa n'inyeshyamba bigaragambya bamagana leta

Minisitiri w’Ububanyi n’amahanga wa Amerika, John Kerry, yavuze ko ibiganiro by’amahoro muri Siriya byagombye kuba ku wa Mbere nk’uko biteganyijwe.

Ibiganiro bishyigikiwe n’Umuryango w’Abibumbye bitegerejwe kubera i Geneva kandi itsinda ritavuga rumwe n’ubutegetsi ryemeje ku wa Gatanu ko rizabyitabira.

Uwufise ububasha kw’isanamu Reuters
Image caption Impande zombi zinubira kurenga ku masezerano yo guhosha imirwano

Igihe yavugaga asoza uruzinduko rwe muri Arabiya Sawudite, Bwana Kerry, yatangaje ko agahenge gaheruka ko guhosha intambara (kariho kuva mu kwezi kwa Kabiri ku ya 27) gasa n’akagikomeje kandi ko urugero rw’ibikorwa by’ubwicanyi rwagabanutse kugeza kuri 90%.

Bwana Kerry yongeyeho ko abategetsi muri Leta Zunze Ubumwe za Amerika n’Uburusiya bari buhure uyu munsi ku wa Gatandatu muri Amman n’i Geneva kugira ngo baganire ku byinubirwa n’uruhande rw’abatavuga rumwe n’ubutegetsi bavuga ko hari ibikubiye mu masezerano yo guhosha imirwano bitakurikijwe.