Tanzania: Ishyaka riri ku butegetsi 'noneho ryiteguye' impinduka ku itegekonshinga

Perezida wa Tanzania Samia Suluhu

Ahavuye isanamu, Reuters

Insiguro y'isanamu,

Ishyaka riri ku butegetsi muri Tanzania rivuga ko rishyigikiye ibikorwa by'ubwiyunge bya Perezida Samia Suluhu

Ishyaka riri ku butegetsi muri Tanzania rya CCM rivuga ko ryiteguye amavugurura ku itegekonshinga, nyuma y'imyaka yari ishize rikwepa igitutu cy'amashyaka atavuga rumwe n'ubutegetsi n'abaharanira uburenganzira bwa muntu kuri iyo ngingo.

Igerageza ryabayeho mbere ryo guhindura itegekonshinga ntiryakunze mu mwaka wa 2014, kubera ko inyandiko y'umushinga waryo yasabaga kugabanya ububasha bwa perezida no gushyiraho akanama kigenga k'amatora.

Ku wa gatatu, Shaka Hamdu Shaka, umunyamabanga ushinzwe ingengabitekerezo no gutangaza amakuru muri CCM, yavuze ko urwego rukuru rw'iri shyaka rurimo "gushimangira" ko bicyenewe ko habaho itegekonshinga rishya.

Yavuze ko iri shyaka rishyigikiye ibikorwa by'ubwiyunge bya Perezida Samia Suluhu.

Kuva mu mwaka wa 2014, ishyaka rikomeye ritavuga rumwe n'ubutegetsi rya CHADEMA hamwe n'ayandi mashyaka, yakomeje guharanira ko habaho itegekonshinga rishya.

Ibyo byatumye abakuru b'ayo mashyaka n'abayoboke bayo bagirana ibibazo n'abategetsi.

Bamwe muri bo bagiye bafungwa inshuro nyinshi kubera gukoresha inama ziga ku itegekonshinga rishya, barimo n'umukuru wa CHADEMA Freeman Mbowe wari wafunzwe mu kwezi kwa karindwi mu 2021, akarekurwa mu kwezi kwa gatatu uyu mwaka.

Uwahoze ari Perezida wa Tanzania John Magufuli, wategetse kuva mu kwezi kwa cumi na kumwe mu 2015 kugeza ubwo yapfaga mu kwezi kwa gatatu mu 2021, yari yaravuze ko nta mavugurura ku itegekonshinga azigera abaho mu gihe cyose yari kuba akiri Perezida.

Inama z'abatavuga rumwe n'ubutegetsi zari zaragabanyijwe mu gihe cy'ubutegetsi bwe.