Leroy Sane: Umukinnyi wo hagati ari hafi yo kujya muri Man City
Ahavuye isanamu, Getty Images
Leroy Sane yafashije Ubudage kugera muri 1/2 muri Euro 2016
Leroy Sane ari hafi yo kwerekeza mu ikipe ya Manchester City avuye muri Schalke ku kiguzi cya miliyoni 37 z'ama pawundi n'imigereka.
Schalke yo mu Budage yatangaje kuri uyu wa Mbere ko Sane yari ari i Manchester kandi ko atazajyana n'ikipe ye muri Otrishe (Austria) mu myitozo ibanziriza shampiyona.
Ku itariki ya 21/7 umutoza wa City, Pepe Guardiola yemeye ku mugaragaro ko ashaka kugura Sane.
Sane w'imyaka 20, ufite ubwenegihugu bw'Ubudage yageze muri kimwe cya kabiri mu irushanwa ry'imikino ya Euro 2016, nyuma yo gukina ku rwego mpuzamahanga mu kwezi kwa Cumi na Kumwe.
Ibinyamakuru mu Budage bivuga ko Sane yabwiye umuyobozi w'imikino muri Schalke, Christian Heidel, ko yashakaga kuva mu ikipe.
Sane, wavuye mu ikipe y'abana ya Schalke, yakinnye mu ikipe nkuru bwa mbere mu kwezi kwa Kane 2014.
yatsinze ibitego 8 mu mikino 33 muri Bundesliga (shampiyona y'Ubudage) muri shampiyona y'umwaka ushize, igihe Schalke yarangizaga ku mwanya wa gatanu, ibura amahirwe yo kujya mu irushanwa rya Champions League ku nshuro ya kabiri mu myaka ibiri yikurikiranyije.
