Diego Costa: Rutahizamu wa Chelase avuga ko yashatse kuva mu ikipe mu mpeshyi

Diego Costa Uwufise ububasha kw’isanamu Getty Images
Image caption Nyuma y'ibitego 14 n'amapasi atanu, Diego Costa ayoboye urutonde rw'ibitego byinshi mu Burayi uyu mwaka we na Mauro Icardi ukinira Inter Milan

Rutahizamu wa Chelsea Diego Costa yavuze ko yari agiye kuva mu ikipe mpeshyi.

Costa yagiye muri Chelsea muri 2014 aguzwe miliyoni 32 z'amafaranga akoreshwa mu Bwongereza (pounds), ariko ngo yari hafi yo gusubira mu ikipe ye yamugurishije ya Atletico Madrid nyuma y'umwaka utaramuhiriye wa 2015-2016.

Kuva icyo gihe uyu munya Esipanye amaze gutsinda ibitego 14 muri shampiyona y'Ubwongereza, mu gihe Chelsea iyoboye urutonde n'umwitangirizwa w'amanota atandatu nyuma yo gutsinda imikino 13 yikurikiranyije.

Costa w'imyaka 28 yagize ati:

"Nashatse kugenda? Yego, yego, nari ndi hafi yo kugenda. Ariko bidatewe na Chelase."

"Hari ikintu nashakaga guhindura kubera impamvu z'umuryango ariko ntibyakunze, nkomeza kwishimira hano."

Costa yatsinze ibitego 20 muri shampiyona ye ya mbere mu Bwongereza igihe Chelsea yatwaraga igikombe cya shampiyona itozwa na Jose Mourinho.

Ariko mbere y'uko Mourinho yirukanwa, mu kwa Cumi na Kabiri 2015, yari amaze gustinda bine gusa, arangiza shampiyona afite 12 gusa ku buryo byavuzwe ko yari ari hafi kuva mu ikipe.

Costa wavukiye muri Brazil yanavuze ko yagize umuhate wo kugerageza kugabanya uburakari n'amahane mu kibuga.

Yagize ati:

Nari nzi ko ngomba guhinduka kuri iyoi ngingo kubera ko muri Premier League nta mpuhwe."

"Bisa n'aho igihe kinini [abasifuzi] bari banyibasiye. Niba batari guhinduka, nagombaga guhinduka."

Chelsea irahura na Tottenham ku wa Gatatu saa 20:00 ku isaha mpuzamahanga ya GMT (saa 22:00 mu Rwanda no mu Burundi).