U Rwanda mu myiteguro yo gusaba kwakira igikombe cy'isi cya 2019

Perezida wa Ferwafa, Vincent Nzamwita (iburyo) ashimangira ko u Rwanda rufite ubushobozi bwo kwakira igikombe cy'isi cyo mu mwaka wa 2019 cy'abatarengeje imyaka 17
Image caption Perezida wa Ferwafa, Vincent Nzamwita (iburyo) ashimangira ko u Rwanda rufite ubushobozi bwo kwakira igikombe cy'isi cyo mu mwaka wa 2019 cy'abatarengeje imyaka 17

Ishyirahamwe ry'umupira w'amaguru mu Rwanda (Ferwafa) riravuga ko riri kwitegura kurangiza gahunda yo gusaba kwakira imikino y'igikombe cy'isi cya 2019 mu mupira w'amaguru cy'abatarengeje imyaka 17 y'amavuko.

Perezida wa Ferwafa, Vincent Nzamwita, ashimangira ko u Rwanda rufite ubushobozi bwo kwakira irushanwa nk'iryo.

Yabwiye BBC ati: "Twamaze kwandikira Fifa tuyisaba kwakira iryo rushanwa kandi baratwanditse banatwoherereza inyandiko z'ubusabe".

Yongeyeho ati: "Twihaye itariki ya 25 y'uku kwezi kwa munani ngo tube twamaze koherereza Fifa ibisabwa hanyuma dutangire kwitegura gukora ubusabe".

Nzamwita yavuze ko kwakira irushanwa nk'igikombe cy'isi bitatuma gusa u Rwanda rumenyekana, ahubwo byanatuma n'akarere ruherereyemo ndetse n'umugabane w'Afurika nabyo bimenyekana.

Mu mwaka ushize, u Rwanda rwakiriye imikino y'irushanwa rya CHAN, rihuza amakipe agizwe n'abakinnyi bakina muri shampiyona zo ku mugabane w'Afurika.

Icyo gihe abantu barenga ibihumbi 200 baturutse hirya no hino muri Afurika, berekeje mu Rwanda gushyigikira amakipe yabo.

Igikombe cy'isi cy'abatarengeje imyaka 17 cy'uyu mwaka kizatangira mu Buhinde ku itariki ya 6 y'ukwezi kwa cumi. Kizitabirwa n'ibihugu 24. Afurika izaba ihagarariwe n'ibihugu bya Ghana, Guinea, Mali na Niger.