Nigeria: Ola Aina yahamagawe mu ikipe y'igihugu

Ola Aina ni umukinnyi wa Chelsea ukina mu buryo bw'intizanyo mu ikipe ya Hull City yo mu cyiciro cya kabiri mu Bwongereza Uwufise ububasha kw’isanamu Getty Images
Image caption Ola Aina ni umukinnyi wa Chelsea ukina mu buryo bw'intizanyo mu ikipe ya Hull City yo mu cyiciro cya kabiri mu Bwongereza

Ola Aina, umukinnyi wa Chelsea ukina muri Hull City mu buryo bw'intizanyo, yahamagawe mu bakinnyi b'ikipe y'igihugu ya Nigeria izakina na Cameroon mu kwezi gutaha mu mikino y'amajonjora y'igikombe cy'isi cya 2018.

Aina yavukiye mu mujyi wa London, akaba yarakiniye ikipe y'ingimbi y'Ubwongereza y'abatarengeje imyaka 16 n'iy'abatarengeje imyaka 20 y'amavuko.

Aina w'imyaka 20 y'amavuko, ntabwo yabashije gukina mu mukino wa gicuti Nigeria yakinnye na Togo mu kwezi kwa gatandatu kuko atari yakwemererwa gukinira Nigeria.

Mu kwezi kwa gatatu, yakoranye imyitozo n'ikipe y'igihugu ya Nigeria ubwo yari imaze gukina umukino wa gicuti na Senegal, umukino wabereye i London.

Ku rutonde rw'abakinnyi 23, umutoza Gernot Rohr w'ikipe ya Nigeria yahamagaye kandi rutahizamu Anthony Nwakaeme ukina mu gihugu cya Israeli. Na we ni ubwa mbere ahamagawe mu ikipe y'igihugu ya Nigeria.