Afurika izakira imikino y'isi mu gusiganwa ku maguru muri 2025?

Hamad Kalkaba Malboum avuga ko Lord Coe, umukuru w'impuzamashyirahamwe yo gusiganwa ku maguru ku isi, ashyigikiye ubusabe bw'Afurika Uwufise ububasha kw’isanamu VALERY HACHE
Image caption Hamad Kalkaba Malboum avuga ko Lord Coe, umukuru w'impuzamashyirahamwe yo gusiganwa ku maguru ku isi, ashyigikiye ubusabe bw'Afurika

Umukuru w'ishyirahamwe ryo gusiganwa ku maguru muri Afurika aravuga ko uyu mugabane uzasaba kwakira imikino yo ku rwego rw'isi yo gusiganwa ku maguru mu mwaka wa 2025.

Nubwo bwose ifite ibihangange byo ku rwego rw'isi mu gusiganwa ku maguru, Afurika ntirigera yacyira ayo masiganwa aba buri myaka ibiri, yatangiye mu mwaka wa 1983.

Hamad Kalkaba Malboum - ukomoka muri Cameroon - avuga ko yizeye ko ubwo busabe buzaturuka muri kimwe mu bihugu 6 byo muri Afurika.

Yagize ati: "Turi kuganira n'ibihugu bya Kenya, Afurika y'epfo, Nigeria, Algeria, Misiri, na Maroc - ibyo bihugu byujuje ibisabwa mu kwakira iyo mikino".

Yongeyeho ati: "Abantu bavugaga ko Afurika itashobora kwakira imikino y'igikombe cy'isi mu mupira w'amaguru, ariko twarayakiriye neza cyane".

Mu mwaka wa 2010 nibwo Afurika y'epfo yakiriye imikino y'igikombe cy'isi mu mupira w'amaguru - bwa mbere mu mateka y'umugabane w'Afurika.

Uwufise ububasha kw’isanamu AFP
Image caption Kenya yasoje iri ku mwanya wa kabiri mu midali mu masiganwa yabereye i London uyu mwaka wa 2017, mu gihe yari ku mwanya wa mbere w'imidali mu mwaka wa 2015

Imikino yo mu mwaka wa 2019 izakirwa na Qatar mu gihe iyo mu mwaka wa 2021 yo izakirwa na Leta Zunze Ubumwe z'Amerika.

Nubwo igihugu kizakira imikino yo mu mwaka wa 2023 kitaratangazwa, Kalkaba avuga ko haba hakiri kare kugira ngo Afurika yakire iyo mikino muri uwo mwaka.

Umwanzuro ku gihugu kizakira imikino yo mu mwaka wa 2025 uzafatwa mu mwaka wa 2020.