Zidane: Ronaldo ni igihangange mu mupira w'amaguru

Cristiano Ronaldo anganyije na Lionel Messi mu kwegukana igihembo cya Ballon d'or inshuro eshanu. Uwufise ububasha kw’isanamu Getty Images
Image caption Cristiano Ronaldo anganyije na Lionel Messi mu kwegukana igihembo cya Ballon d'or inshuro eshanu.

Umutoza wa Real Madrid yavuze ko Cristiano Ronaldo ariwe mukinnyi w'igihangange mu mateka y'umupira w'amaguru.

Uyu mukinnyi ukomoka muri Portugal ukina imbere yegukanye ku nshuro ya gatanu igihembo cy'umukinnyi urusha abandi ku isi, Ballon d'or.

Ubu rero anganyije na Lionel Messi mu kwegukana icyo gihembo inshuro eshanu.

Umutoza we muri Real Madrid, Zinedine Zidane wegukanye igikombe cy'isi mu ikipe y'Ubufaransa muri 1998, yavuze ko arushwa kure na Cristiano Ronaldo.

Ariko ngo nta kibazo bimuteye ngo kubera ko yagize ibihe byiza mu mupira w'amaguru.

Ronaldo, w'imyaka 32, yatsinze ibitego 418 mu mikino 412 amaze gukinira ikipe ya Real Madrid.

Yegukanye kandi igikombe cy'Uburayi cya Champions League inshuro eshatu n'ibikombe bibiri bya shampiyona mu myaka umunani amaze muri iyo kipe.