Giroud na William bashikanye Chelsea mu gice ca kane ca FA

Olivier Giroud asoma Emmerson inyuma yaho amuhereye ipasi yatumye atsinda Uwufise ububasha kw’isanamu Getty Images
Image caption Olivier Giroud asoma Emmerson inyuma yaho amuhereye ipasi yatumye atsinda

Igitsindo ca mbere ca Giroud muri Chelsea hamwe n'ivyinjijwe na William vyafashije umugwi wa Chelsea gutahukana intsinzi yatumye uwo mugwi winjira mu gice ca kane ca FA Cup.

Inyuma y'iyo ntsinzi ya 4-0 kuri Hull City, umumenyereza Antonio Conte yavuze ko imuhaye "ukwikeka kwiza" mu gihe umugwi wiwe uzohura na Barcelona ku munsi wa kabiri.

Willian niwe yinjije igitsindo ca mbere, Pedro yinjiza ica kabiri ku pasi ivuye kwa Cesc Fabregas.

William yarinjije igitsindo kigira kabiri abanje guhererekana na Giroud.

Munyuma umukinyi w'imbere w'Ubufaransa yahora muri Arsenal, Giroud nawe nyene yahavuye yinjiza igitsindo ciwe ca mbere kuva aja muri Chelsea, aherejwe ipasi n'umukinyi mushasha Emerson Palmieri.

Hull yaragerageje gukina neza mu gice ca kabiri, umukinyi David Meyler araronka penaliti ariko yigijweyo na Willy Caballero.

Kuri uno wa gatandatu mw'ijoro, niho Chelsea imenya umugwi bazohura mu gice ca kane ca FA Cup, ariko uwo mugwi ukaba wimirije gukina na Barcelona ku munsi wa kabiri muri Champions League.