Igikombe cy'isi cya 2018: Umutoza Gareth Southgate aravuga ko Ubwongereza buri mu itsinda rikomeye

Kapiteni Harry Kane n'umutoza Gareth Southgate ni bo baza kuba bayoboye Ubwongereza mu mukino na Tuniziya kuri uyu wa mbere Uwufise ububasha kw’isanamu Getty Images
Image caption Kapiteni Harry Kane n'umutoza Gareth Southgate ni bo baza kuba bayoboye Ubwongereza mu mukino na Tuniziya kuri uyu wa mbere

Umutoza Gareth Southgate w'Ubwongereza avuga ko Ubwongereza buri muri rimwe mu matsinda akomeye cyane muri iyi mikino y'igikombe cy'isi iri kubera mu Burusiya.

Kuri uyu wa mbere, Ubwongereza buratangira bukina n'ikipe ya Tuniziya, mu mukino uri bubere ku kibuga cy'i Volgograd.

Ubwongereza buri mu itsinda G aho buri kumwe na Tuniziya, Panama n'Ububiligi.

Umutoza Southgate yagize ati:

"Igihe amatsinda yatangazwaga, buri wese yabonaga ko iri ari itsinda ryoroshye kurusha ayandi yose. Jye ndabona ko ari rimwe mu yakomeye cyane ugendeye ku kuntu twebwe, Tuniziya, ndetse birumvikana n'Ububiligi, duhagaze ku rutonde rwa FIFA".

Ku rutonde rwa FIFA, Ububiligi buri ku mwanya wa gatatu mu gihe Ubwongereza buri ku mwanya wa 12, Tuniziya ku mwanya wa 21, naho Panama ikaba ku mwanya wa 55.

Umutoza Southgate w'Ubwongereza aravuga ko umukino na Tuniziya bawitondeye, nkuko byajyaga kugenda iyo baba bagiye gukina n'ikipe nka Brezili.

Kuva haba imikino y'igikombe cy'isi cy'umupira w'amaguru cyabereye mu Budage mu mwaka wa 2006, Ubwongereza ntiburigera butsinda umukino wabwo ubanza mu irushanwa ryo ku rwego rwo hejuru.

Kandi umutoza Southgate aremeza ko n'ubu mu Burusiya, ikipe ye itazoroherwa.