Luis Enrique, umutoza mushya w'ikipe ya Espanye

Luis Enrique yatoje Barcelona hagati y'umwaka wa 2014 na 2017ndetse yanatoje AS Roma na Celta Vigo Uwufise ububasha kw’isanamu Getty Images
Image caption Luis Enrique yatoje Barcelona hagati y'umwaka wa 2014 na 2017ndetse yanatoje AS Roma na Celta Vigo

Luis Enrique wigeze gutoza Barcelona na AS Roma, ni we umaze kugirwa umutoza w'ikipe y'igihugu y'umupira w'amaguru ya Espanye.

Enrique w'imyaka 48 y'amavuko wahoze akina nk'umukinnyi wo hagati mu ikipe ya Espanye, asimbuye Fernando Hierro weguye ku cyumweru.

Umutoza Fernando Hierro wa Espanye yeguye

Neymar: Barcelona "ikwiye ubuyobozi bwiza kurushaho"

Hierro - utazanasubira ku kazi yakoraga mbere k'umutoza w'ibya siporo mu ikipe y'igihugu ya Espanye - yari yabaye ahawe gutoza ikipe ya Espanye nyuma yo kwirukanwa kwa Julen Lopetegui habura iminsi ibiri ngo igikombe cy'isi cy'uyu mwaka gitangire.

Kuva yava mu ikipe ya Barcelona mu kwezi kwa gatandatu mu mwaka ushize, Enrique nta yindi kipe yari yakabonye yo gutoza.

Agiye gutoza ikipe ya Espanye yasezerewe n'Uburusiya kuri penaliti mu mikino ya kimwe cy'umunani cy'irangiza mu gikombe cy'isi cy'uyu mwaka kiri kubera mu Burusiya.

Mu mwaka wa 2015, Enrique - wakiniye ikipe ya Real Madrid n'iya Barcelona - yatwaye igikombe cya shampiyona ya Espanye La Liga, igikombe cya Espanye ndetse atwara na Champions League inshuro eshatu.

Ishyirahamwe ry'umupira w'amaguru muri Espanye ryamugize umutoza w'ikipe y'igihugu kuri uyu wa mbere, ryahise rinashyiraho Jose Francisco Molina, wahoze ari umunyezamu wa Espanye, nk'umuyobozi ushinzwe ibya siporo mu ikipe y'igihugu.

Iri shyirahamwe ryatangaje ko ryari rimaze igihe rishakisha "umuyobozi udashidikanywaho n'abakinnyi, utanga urugero kandi ntihagire n'umwe urenga ku mabwiriza ye."